काठमाडौं। नेपालमा पहिलो पटक टियर फोर हाइपरस्केल डाटा सेन्टर निर्माण हुने भएको छ। बिहीबार पत्रकार सम्मेलन गर्दै बिचुटेन डाटा भल्ट प्रालिले देशको डिजिटल पूर्वाधारलाई नयाँ उचाइमा पुर्‍याउने घोषणा गरेको हो।

कम्पनीले यो परियोजना नेपाली उद्यमी नवीन अग्रवाल, मीन अग्रवाल, अनुज कियाल, विशाल कुमार जाटिया र शरद गोयलको नेतृत्वमा अघि बढाइएको जनाएको छ। परियोजनाले नेपालको डिजिटल सार्वभौमिकता र डाटा सुरक्षालाई मजबुत बनाउने लक्ष्य लिएको छ।

कम्पनीका अनुसार डाटा सेन्टर काठमाडौं र वीरगन्जमा निर्माण गरिनेछ। प्रारम्भिक चरणमा २४० किलोवाट क्षमताबाट सुरु हुने परियोजनालाई सन् २०३० सम्म ५ मेगावाट क्षमतामा विस्तार गर्ने योजना रहेको छ।

यो नेपालकै पहिलो टियर फोर प्रमाणित डाटा सेन्टर हुने दाबी गरिएको छ। यस्तो स्तरको डाटा सेन्टरले ९९.९९५ प्रतिशत अपटाइम सुनिश्चित गर्ने भएकाले वर्षभरि अत्यन्त न्यून प्राविधिक अवरोध मात्र हुने कम्पनीले जनाएको छ।

परियोजनामा इन कन्ट्री डाटा रेसिडेन्सी अवधारणालाई प्राथमिकता दिइएको छ। यसले विदेशी सर्भरमाथिको निर्भरता घटाउँदै राष्ट्रिय साइबर सुरक्षा र डिजिटल आत्मनिर्भरता मजबुत बनाउने अपेक्षा गरिएको छ।

ऊर्जा दक्ष र नेपालकै जलविद्युतमा आधारित हुने भएकाले यो डाटा सेन्टरलाई वातावरणमैत्री पूर्वाधारका रूपमा विकास गरिने कम्पनीले जनाएको छ। साथै, सूचना प्रविधि र इन्जिनियरिङ क्षेत्रमा ठूलो मात्रामा रोजगारी सिर्जना हुने विश्वास गरिएको छ।

कम्पनीले बिचुटेन नाम जापानी बौद्ध परम्परामा भगवान विष्णुको नामबाट प्रेरित रहेको बताएको छ, जसको अर्थ रक्षक भन्ने हुन्छ। दीर्घकालीन रूपमा नेपालमै सर्भर, क्यामेरा, ल्यापटप र ट्याब्लेट उत्पादन गर्ने लक्ष्य पनि कम्पनीले अघि सारेको छ।