काठमाडौं। सरकारले काठमाडौं उपत्यकाका नदी किनार तथा सार्वजनिक जग्गा अतिक्रमण गरी बनाइएका बस्ती हटाएपछि ती क्षेत्र अहिले उजाड बनेका छन्। डोजर लगाएर घरटहरा हटाइएपछि त्यहाँ बसोबास गर्दै आएका धेरैलाई होल्डिङ सेन्टरमा राखिएको छ।

भत्काइएका बस्तीका भग्नावशेषबीच अहिले कवाडी संकलन गर्नेहरूको चहलपहल बढ्न थालेको छ। उनीहरूका लागि उजाड बनेका ती बस्ती अहिले आम्दानीको नयाँ स्रोत बनेका छन्।

गत शनिबार टेकुस्थित वंशीघाट क्षेत्रको सुकुम्बासी बस्ती हटाइएपछि त्यहाँ जस्तापाता, फलाम तथा अन्य धातुजन्य सामग्री संकलन गर्न बिहानैदेखि कवाडी व्यवसायी पुग्ने गरेका छन्।

भत्काइएका घरटहराबाट प्रयोगयोग्य सामग्री छुट्याएर बिक्री गर्ने काम अहिले ती क्षेत्रमा तीव्र बनेको देखिन्छ। कतिपयले पुराना जस्ता, फलामका रड, ढोका–झ्यालका भाग तथा अन्य धातुजन्य सामग्री संकलन गरिरहेका छन्।

सरकारले सार्वजनिक जग्गा संरक्षण र नदी किनार व्यवस्थापन अभियानअन्तर्गत बस्ती हटाउने कार्यलाई निरन्तरता दिइरहेको छ। तर विस्थापित परिवारहरूको पुनःस्थापना, वैकल्पिक आवास र जीविकोपार्जनको विषय भने अझै बहसको केन्द्रमा रहेको छ।