काठमाडौं । पूर्वमन्त्री सुदन किराती श्रम संस्कृति पार्टीको वरिष्ठ नेता हुने भएका छन् । गएराति पार्टी अध्यक्ष हर्क साम्पाङ एक समझदारी गर्दै किरातीलाई वरिष्ठ नेता बनाउन तयार भएका हुन् ।

किराती समूहबाट एक जना सचिव र १५ जना सदस्य हुने समझदारीपत्रमा उल्लेख छ । आजै बागबजारको हार्दिक होटलमा पत्रकार सम्मेलन गरी किराती समूह श्रम संस्कृति पार्टीमा प्रवेश हुने छ ।

पूर्वमाओवादी नेता किराती पार्टी अध्यक्षसमेत रहेका पुष्पकमल दाहाल ‘प्रचण्ड’ले पर्यटनमन्त्रीबाट हटाएपछि यति असन्तुष्ट थिए कि उनले पार्टी नै छाडे । उनले एक अन्तर्वार्तामा भनेका छन्– प्रचण्डले हठात् मन्त्रीबाट हटाउँदा मेरो बेहाल भयो ।’

यसपछि माओवादी पार्टी छाडेका उपमहासचिव जनार्दन शर्मासँग मिलेर प्रगतिशील लोकतान्त्रिक पार्टी खोले । ५ जना रहेको अध्यक्षमण्डलको सदस्य भए ।

यही भूमिकामा हुँदा उनले भोजपुर र सुनसरी–१ मा साम्पाङको दल श्रम संस्कृति पार्टीका उम्मेदवारहरूलाई सघाए । प्रलोपा यतिबेला लोप भइसकेको छ ।

किरातीले प्रतिनिधिसभाको पाँचौँ ठूलो दल श्रम संस्कृतिलाई रोजे । केही दिनअघि अध्यक्ष हर्कले एकतर्फी रुपमा पार्टीको वार्ता समिति भंग गरेको विवरण सार्वजनिक भएको थियो ।

लगत्तै साम्पाङले उक्त समाचारको खण्डन गर्दै किराती श्रम संस्कृति पार्टीको बलियो खम्बा भइसकेको बताएका थिए । नभन्दै वरिष्ठ नेताको हैसियतसहित उनी आफ्नो समूहलाई श्रम संस्कृति पार्टीमा विलय गराउन तयार भए ।