काठमाडौं। नेकपाका संयोजक पुष्पकमल दाहाल ‘प्रचण्ड’ले संघीय संसदलाई समावेशी सहिदहरूको बलिदानको उपजका रूपमा व्याख्या गरेका छन्।

प्रतिनिधिसभाको बैठकमा सम्बोधन गर्दै उनले संसद भवनलाई भौतिक संरचना मात्र नभई विभिन्न आन्दोलन र संघर्षको परिणाम भएको बताए। उनले भने, ‘बाहिरबाट हेर्दा यो भवन सिमेन्ट, इँट र फलामले बनेको छ तर यसको अन्तर्यमा हजारौं सहिदको बलिदान रहेको छ।’

प्रचण्डका अनुसार हरेक वर्ग, वर्ण, जाति, लिंग र समुदायको प्रतिनिधित्व सुनिश्चित भएको वर्तमान संसद लामो संघर्ष र बलिदानको परिणाम हो। उनले थपे, ‘हरेक वर्ग, वर्ण, जाति, लिंग र समुदायको प्रतिनिधित्व भएको यो इन्द्रेणी संसदका लागि हिजो हामीले बन्दुक उठायौं, आन्दोलन गर्‍यौं।’

उनले संसदको आधार नै ऐतिहासिक आन्दोलन र शहादत भएको उल्लेख गर्दै भने, ‘यो भवनको जगमा त्यही शहादत छ। यसका हरेक भित्ता बलिदानले रंगिएका छन्। म इतिहासका ती सबै, सशस्त्र र शान्तिपूर्ण आन्दोलन एवं पछिल्लो जेनजी आन्दोलनसम्मका सहिद, बेपत्ता, घाइते योद्धा र अभियानकर्मीहरुप्रति हार्दिक कृतज्ञता प्रकट गर्दछु।’

सम्बोधनका क्रममा उनले राष्ट्रिय स्वतन्त्र पार्टी (रास्वपा) को निर्वाचन सफलताको पनि प्रशंसा गरेका छन्। उनले भने, ‘हिजो सत्ता र प्रतिपक्ष दुवै भूमिकामा सहकार्य गरेको राष्ट्रिय स्वतन्त्र पार्टीले यो निर्वाचनमा झण्डै दुई तिहाइको सफलता पाएको छ। त्यसका लागि सभापति माननीय रवि लामिछाने र सम्माननीय प्रधानमन्त्री बालेन्द्र शाहलाई मेरो विशेष बधाई छ।’

प्रचण्डले समावेशी लोकतन्त्र र आन्दोलनबाट प्राप्त उपलब्धिहरूको संरक्षण सबैको साझा जिम्मेवारी भएको धारणा पनि राखेका छन्।