काठमाडौं । अघिल्ला तीन कारोबार दिन लगातार बढेको सेयर बजार मंगलबार घटेको छ। यस दिन नेप्से परिसूचक ३९.४४ अंक (१.४१ प्रतिशत) ले घटेर २७४४ अंकमा पुगेको छ।

अघिल्लो दिन सोमबार भने बजार ३८.१९ अंक (१.३९ प्रतिशत) ले बढेको थियो। त्यसअघि लगातार तीन दिन बजारमा वृद्धि देखिएको थियो।

बजार घटेसँगै लगानीकर्ताको मनोबलमा दबाब देखिए पनि कारोबार रकम भने सामान्य रूपमा बढेको छ। मंगलबार ४ अर्ब ६६ करोड रुपैयाँ बराबरको सेयर कारोबार भयो, जुन सोमबारको ४ अर्ब ६१ करोडभन्दा केही बढी हो।

नीति तथा कार्यक्रमपछि बजारमा दबाब

अघिल्लो दिन सरकारले आगामी आर्थिक वर्ष २०८३/८४ को नीति तथा कार्यक्रम प्रस्तुत गरेको थियो। पूँजीबजारसम्बन्धी केही विषय समेटिए पनि कार्यान्वयनको सुनिश्चिततामाथि लगानीकर्ताको विश्वास कमजोर देखिएको छ।

नीति तथा कार्यक्रममा गैरआवासीय नेपालीलाई बजारमा सहभागी गराउने, नेप्सेको पुनर्संरचना गर्ने तथा बन्ड बजार विस्तार गर्ने जस्ता पुरानै घोषणा दोहोरिएका छन्। तर ती योजनाहरू व्यवहारमा कति कार्यान्वयन हुन्छन् भन्नेमा अझै अन्योल छ।

अधिकांश समूह राताम्य

मंगलबार बजारका लगभग सबै समूहका सूचक घटेका छन्। बैंकिङ ०.८३ प्रतिशत, विकास बैंक १.३७ प्रतिशत, फाइनान्स २.०३ प्रतिशत, होटल तथा पर्यटन २.०२ प्रतिशत, हाइड्रोपावर २.२२ प्रतिशत, लगानी १.३० प्रतिशत, जीवन बीमा ०.५४ प्रतिशत, उत्पादन तथा प्रशोधन १.६५ प्रतिशत, माइक्रोफाइनान्स १.५१ प्रतिशत, निर्जीवन बीमा ०.७७ प्रतिशत, अन्य १.४९ प्रतिशत र व्यापार समूह २.३३ प्रतिशतले घटेका छन्।

केही कम्पनीमा तीव्र उतारचढाव

धौलागिरि लघुवित्तको सेयर मूल्य १५ प्रतिशतले बढ्दै सबैभन्दा धेरै वृद्धि देखियो। डिबेन्चर समूहका केही कम्पनी पनि माथिल्लो सूचीमा रहे।

यता, फर्स्ट माइक्रोफाइनान्सको सेयर मूल्य सबैभन्दा धेरै १२.४० प्रतिशतले घट्यो। झापा इनर्जी ६.८९ प्रतिशत, आत्मनिर्भर लघुवित्त ६.११ प्रतिशत र होटल फरेस्ट इन ६.१० प्रतिशतले घटे।

सर्वाधिक कारोबार भएका कम्पनी

आज सबैभन्दा धेरै कारोबार हुने कम्पनीमा नेसनल हाइड्रोपावर, रिलायन्स स्पिनिङ मिल्स, रिडी पावर, शिवम् सिमेन्ट र एसवाई प्यानल रहेका छन्।