काठमाडौं । आर्थिक वर्ष २०८३/०८४ का लागि सरकारले ल्याएको नीति तथा कार्यक्रममाथि सांसदहरूले उठाएका प्रश्नको जवाफ अर्थमन्त्री डा. स्वर्णिम वाग्लेले दिने भएका छन् ।

बुधबार बस्ने प्रतिनिधिसभा बैठकमा नीति तथा कार्यक्रममाथिको छलफल टुंग्याएर अर्थमन्त्री वाग्लेले जवाफ दिने कार्यसूची तय गरिएको छ ।

यसअघि नीति तथा कार्यक्रममाथि सांसदहरूले उठाएका प्रश्नको जवाफ प्रधानमन्त्रीले दिने परम्परा रहँदै आएको थियो । तर यसपटक बालेन्द्र शाह नेतृत्वको सरकारले प्रधानमन्त्रीको सट्टा अर्थमन्त्रीमार्फत जवाफ दिने तयारी गरेको प्रधानमन्त्रीको सचिवालयले जनाएको छ ।

प्रधानमन्त्री सचिवालयका एक सदस्यका अनुसार, ‘नीति तथा कार्यक्रममाथि सांसदहरूले उठाएका प्रश्नको जवाफ अर्थमन्त्रीले दिने कार्यक्रम छ । सहमतिमै यस्तो कार्यसूची तय गरिएको हो ।’

यसअघि संघीय संसद् सचिवालयले सार्वजनिक गरेको कार्यसूचीमा भने प्रधानमन्त्री शाहले नै जवाफ दिने उल्लेख गरिएको थियो ।

वैशाख २८ गते बसेको संघीय संसद्को संयुक्त बैठकमा राष्ट्रपति रामचन्द्र पौडेलले आर्थिक वर्ष २०८३/०८४ का लागि सरकारको नीति तथा कार्यक्रम प्रस्तुत गरेका थिए ।