काठमाडौं। नेकपा एमालेकी सांसद साजिदा खातुन सिद्धिकीले सुकुम्बासीमाथि भइरहेको डोजर आतंकबारे कडा आपत्ति जनाउँदै प्रधानमन्त्री बालेन्द्र शाहकाे आलाेचना गरेकी छन् । 

प्रतिनिधिसभाको बैठकमा शून्य समयमा बोल्दै उनले भनिन्, ‘सुकुम्बासी सवाल आज देशको मात्रै नभएर विदेशको पनि बनेको छ। २४ घण्टाको सूचना र डोजर आतंकले मुटु नै छियाछिया बनाएको छ।’

उनका अनुसार विकासको नाममा गरिबलाई घरबारविहीन बनाउनु अमानवीय व्यवहार हो र त्यसले राज्यको संवैधानिक मूल्य तथा मौलिक हकको उपहास गरेको छ।

सांसद सिद्धिकीले चेतावनी दिंदै थपिन्, ‘मानवताले हार मानेको बेला देश कसरी हाँस्न सक्छ? विकासको नाममा नागरिकलाई उजाड बनाउने अधिकार कसलाई छ?’

सिद्धिकीले प्रधानमन्त्री नेतृत्वको वर्तमान सरकारले जनतामाथि लागू गरिरहेको कठोर नीति–व्यवहार राष्ट्रिय स्वतन्त्र पार्टीको बाचा–प्रतिबद्धतासँगै मेल नखाने टिप्पणीसमेत गरिन्।

‘रास्वपाको बाचापत्र देश र नागरिकको पहिचान बन्नुपर्ने थियो। आशा गर्छु-आगामी दिनमा त्यो बाचा पूरा होस्। सरकार त रास्वपाकै छ,’ उनको भनाइ थियो।

सांसद सिद्धिकीले संविधानले प्रत्याभूत गरेको सम्मानपूर्वक बाँच्ने अधिकारलाई राज्यले सुनिश्चित गर्नुपर्ने भन्दै गरिब वस्तीसम्म आइपुगेको डोजर अभियान तत्काल रोक्न माग गरिन्।