कपिलवस्तु । कपिलवस्तुको शिवराज नगरपालिकाअन्तर्गत रहेको आधारभूत स्वास्थ्य सेवा अस्पताल, चन्दौटाको सरकारी रकम हिनामिना गरेको आरोपमा प्रहरीले ५ जनालाई पक्राउ गरेको छ ।

प्रहरीका अनुसार अस्पतालको सेवा शुल्क र फार्मेसीबाट संकलन भएको करिब ३८ लाख १९ हजार ७७० रुपैयाँ रकम बैंकमा जम्मा गर्नुको सट्टा नक्कली बैंक भौचर बनाएर हिनामिना गरिएको पाइएको छ ।

आर्थिक वर्ष २०८१/८२ को लेखापरीक्षणका क्रममा १२९ वटा बैंक भौचर फाइलमा भेटिए पनि सो बराबरको रकम बैंक खातामा जम्मा नभएको खुलेपछि घटना सार्वजनिक भएको हो ।

पक्राउ पर्नेमा शिवराज नगरपालिकाको स्वास्थ्य शाखा प्रमुख चूडामणि भट्टराई, अस्पतालका मेडिकल सुपरिटेन्डेन्ट डा. अमित पाण्डेय, फार्मेसी सहायक रुक्सना खातुन, नेपाल बैंक लिमिटेड चन्दौटा शाखाका क्यासियर कमल प्रसाद भण्डारी र कार्यालय सहयोगी विक्रम केसी रहेका छन् ।

उनीहरूलाई ठगी तथा आपराधिक विश्वासघातसम्बन्धी कसुरमा पक्राउ गरी ७ दिनको म्याद लिएर अनुसन्धान भइरहेको प्रहरीले जनाएको छ ।