काठमाडौं। प्रतिनिधिसभा बैठक बुधबार पनि अवरुद्ध भएपछि राजनीतिक तनाव थपिएको छ ।

सभामुख डिपी अर्याल ले १५ मिनेटका लागि स्थगित गरेको बैठक एक घण्टा बितिसक्दा पनि सुरु हुन सकेको छैन । विपक्षी दलहरूले प्रधानमन्त्री बालेन शाह उपस्थित नभएसम्म बैठक अघि बढ्न नदिने अडान लिएपछि सदनमा नाराबाजी भएको हो ।

विपक्षी दलहरूको माग अनुसार नीति तथा कार्यक्रममाथिको छलफलको जवाफ प्रधानमन्त्रीबाटै आउनुपर्ने भनिएको छ । तर सरकार पक्षले प्रधानमन्त्रीको सट्टा अर्थमन्त्री स्वर्णिम वाग्ले ले जवाफ दिने तयारी गरेपछि विवाद चर्किएको हो ।

शून्य समयमा सांसदहरूले बोलिसकेपछि सभामुख अर्यालले अर्थमन्त्री वाग्लेलाई समय दिएका थिए । त्यसपछि कांग्रेस, एमाले, नेकपा र श्रम संस्कृति पार्टीका सांसदहरूले विरोध जनाउँदै प्रधानमन्त्रीको अनुपस्थितिमा छलफल अघि बढाउन नहुने अडान राखेका थिए ।

सत्तापक्षका सांसदहरूले भने प्रतिनिधिसभा नियमावलीको दफा ३८ अनुसार प्रधानमन्त्री अनुपस्थित भएमा सम्बन्धित मन्त्रीले जवाफ दिन सक्ने व्यवस्था रहेको भन्दै बैठक सञ्चालन गर्नुपर्ने तर्क गरेका छन् ।

तर विपक्षीले प्रधानमन्त्रीको प्रत्यक्ष उपस्थितिबिना नीति तथा कार्यक्रममाथिको छलफल अर्थहीन हुने भन्दै सभामुखसँग कडा आपत्ति जनाएका छन् ।

विवाद चर्किएपछि सभामुख अर्यालले बैठक स्थगित गर्दै अहिले प्रमुख सचेतकहरूसँग छलफल गरिरहेका छन् ।