काठमाडौं । नेपाली कांग्रेसका नेता मोहन बस्नेत ले महामन्त्री गगन थापा माथि पार्टी ‘हाइज्याक’ गरेर कब्जा गरेको आरोप लगाएका छन् ।

काठमाडौंमा आयोजित बागमती प्रदेशस्तरीय भेलालाई सम्बोधन गर्दै बस्नेतले आफू गगन थापाको सुरुदेखिकै विरोधी रहेको बताएका हुन् ।

उनले भने, ‘गगन थापाजीको त सबभन्दा पहिलादेखि विरोधी म हुँ, बाहिर–भित्र सबै ठाउँमा । हाइज्याक गरेर पार्टी कब्जा गराइएको एउटा पात्र हुन् । त्यसकारण उहाँसँग गलत तरिकाले लत्रेर, झुकेर, सबै साथीभाइको सहमति नभईकन जान्नँ । तपाईँहरूको साथमा सधैँभरि लड्नेछु, जसरी हिजो लडेको हुँ, त्योभन्दा बढी लड्नेछु ।’

बस्नेतले पार्टीभित्र कृत्रिम रूपमा नेतृत्व निर्माण गरिएको आरोप लगाउँदै सहमति र सामूहिक भावनाविनाका निर्णय स्वीकार्य नहुने बताए । उनले पार्टीभित्र वार्ता शक्ति र क्षमताको आधारमा मात्रै सम्भव हुने धारणा राखे ।

उनले आवश्यक परे युवा तथा भ्रातृ संस्थाका कार्यकर्तालाई सडक संघर्षमा उतार्नुपर्ने चेतावनीसमेत दिए । वर्तमान नेतृत्वले एकल ढंगले भ्रातृ संस्थाहरू सञ्चालन गर्न खोजेको आरोप पनि उनले लगाए ।

क्रियाशील सदस्यता अद्यावधिक प्रक्रिया तत्काल खारेज गर्न माग गर्दै उनले त्यसको छानबिनका लागि छुट्टै समिति गठन गर्नुपर्ने बताए । साथै कांग्रेसको १५औँ महाधिवेशनका लागि घोषणा गरिएका दुवै मिति रद्द गरेर सहमतिका आधारमा नयाँ मिति तय गर्नुपर्ने उनको भनाइ थियो ।