काठमाडौं । प्रधानमन्त्री बालेन्द्र शाह ले नीति तथा कार्यक्रममाथि उठेका प्रश्नको जवाफ आफैँ नदिने भएका छन् ।

संसदको कार्यसूची संशोधन गर्दै प्रधानमन्त्रीको स्थानमा अर्थमन्त्री डा. स्वर्णिम वाग्ले ले जवाफ दिने व्यवस्था गरिएको हो ।

बिहान सार्वजनिक गरिएको कार्यसूचीमा प्रधानमन्त्रीले नै जवाफ दिने उल्लेख थियो । पछि कार्यसूची सच्याएर अर्थमन्त्रीलाई जिम्मेवारी दिइएको जनाइएको छ ।

हिजो प्रमुख प्रतिपक्षी दलहरूले प्रधानमन्त्री स्वयं उपस्थित भएर जवाफ दिनुपर्ने माग गर्दै दिनभर संसद् अवरोध गरेका थिए । त्यसक्रममा सभामुख डोलप्रसाद अर्याल ले प्रधानमन्त्रीसँग आफूले संवाद गर्ने बताएका थिए ।

तर प्रधानमन्त्री आज पनि संसद्मा उपस्थित हुन तयार नभएको जनाइएको छ ।