काठमाडौं। नेपाली कांग्रेसका सचेतक निश्कल राईले प्रधानमन्त्री बालेन्द्र शाह (बालेन) नीति तथा कार्यक्रममाथि उठेका प्रश्नहरूको जवाफ दिन संसदमा नआए अवरोध जारी रहने बताएका छन् ।

उनले प्रधानमन्त्री बालेन संविधानको ७६ (१०) अनुसार संसदप्रति उत्तरदायी बनाउनैपर्ने बताए ।
उनी संसदको नेता मात्रै नभएर अभिभावक भएको भन्दै उनको उपस्थिति संसद बैठकमा अनिवार्य भएको बताए ।
उनले बालेनप्रति लक्षित गर्दै भने, ‘सदन एउटा चिया चौतारी होइन । चिया खान मन लाग्दा आउने, मन नलाग्दा नआउने ।सदन गुरुकुल हुनुपर्छ । यो विश्वविद्यालय हो ।’

उनले सदनमा ‘बंक’ गरेको र संसदीय अभ्यासप्रतिको उदासिनता देखाएको आरोप लगाए ।

उनले सत्तापक्षीय दल रास्वपाका सांदसहरूले प्रधानमन्त्रीको अनुपस्थितिलाई सामान्यीकरण गर्न खोजेको भन्दै आपत्ति पनि जनाए ।