काठमाडौं । नेपाल इन्भेष्टमेन्ट मेगा बैंक का प्रमुख कार्यकारी अधिकृत (सीईओ) ज्योति प्रकाश पाण्डे को पक्राउ गैरकानुनी रहेको दाबी गर्दै उनकी श्रीमती निरु दाहालले सर्वोच्च अदालतमा बन्दी प्रत्यक्षीकरण रिट दायर गरेकी छन् ।

पाण्डेलाई नेपाल प्रहरीको केन्द्रीय अनुसन्धान ब्यूरो ले ‘ठगी तथा आपराधिक विश्वासघात’ मुद्दामा आइतबार राति सिन्धुलीबाट पक्राउ गरेको थियो ।

सीईओ पाण्डेको पक्राउविरुद्ध दायर गरिएको रिटमाथि बिहीबार सर्वोच्च अदालतका न्यायाधीश अब्दुल अजीज मुसलमान को एकल इजलासमा सुनुवाइ भइरहेको छ ।

सीआईबीका अनुसार स्मार्ट टेलिकम को सम्पत्ति व्यवस्थापनका क्रममा नेपाल सरकारको हक टुट्ने गरी ठगी तथा आपराधिक विश्वासघात गरेको आरोपमा पाण्डेलाई पक्राउ गरिएको हो ।

प्रहरीको दाबीअनुसार अनुमति पत्र नवीकरण नभएपछि सरकारको नियन्त्रणमा आएको स्मार्ट टेलिकमको सम्पत्ति लिलामी प्रक्रियामा पाण्डेले बैंकको तर्फबाट बदनियतपूर्ण भूमिका खेलेका थिए ।

रिटमा निवेदक निरु दाहालले पाण्डेलाई गैरकानुनी रूपमा थुनामा राखिएको जिकिर गर्दै तत्काल रिहा गर्न माग गरेकी छन् ।