एजेन्सी। तमिलनाडुको राजनीतिमा नयाँ मोड ल्याउँदै एमके स्टालिन नेतृत्वको डीएमके सरकारलाई हटाएर सत्तामा आएको टीवीके पार्टी फेरि चर्चामा आएको छ ।

मुख्यमन्त्री बनेपछि जोसेफ विजय लगातार राजनीतिक तथा सामाजिक बहसको केन्द्रमा रहँदै आएका छन् । पछिल्लो समय उनको मन्त्रिपरिषद् विस्तारले विशेष ध्यान आकर्षित गरेको छ, विशेषगरी अनुसूचित जाति (दलित) समुदायका मन्त्रीहरूको उल्लेख्य सहभागिताका कारण ।

यो मन्त्रिपरिषद् तमिलनाडुको इतिहासकै सबैभन्दा ठूलो क्याबिनेटमध्ये एक मानिएको छ । राजनीतिक विश्लेषकहरूका अनुसार यो विस्तार विजय नेतृत्वको सरकारप्रति बढ्दो जनसमर्थनको संकेतका रूपमा हेरिएको छ । साथै, सबैभन्दा बढी अनुसूचित जातिका मन्त्रीहरू समावेश गरिएको कारण पनि यो मन्त्रिपरिषद्ले नयाँ कीर्तिमान बनाएको बताइएको छ ।

विजयको मन्त्रिपरिषद्मा अनुसूचित जातिका ८ जना विधायकलाई मन्त्री बनाइएको छ । सामाजिक समावेशीकरण र सन्तुलित प्रतिनिधित्वलाई प्राथमिकता दिँदै सरकारले २३ जना नयाँ मन्त्रीहरूलाई समेटेको हो ।

विश्लेषकहरूका अनुसार अघिल्लो मन्त्रिपरिषद्को तुलनामा यसपटक जातीय सन्तुलन, क्षेत्रीय प्रतिनिधित्व, सहयोगी दलहरूको सहभागिता तथा युवा नेताहरूलाई अवसर दिने प्रयास स्पष्ट रूपमा देखिएको छ ।

हाल मुख्यमन्त्री विजयसहित मन्त्रिपरिषद् सदस्यहरूको कुल संख्या ३५ पुगेको छ ।