काठमाडौं। दर्शकको ध्यान आकर्षित गर्न सफल हुँदै आएको नेपाली फिल्म ‘रोल नं १’ का निर्माताले माफीनामा सार्वजनिक गरेका छन्।

विशेषगरी पूर्वी नेपालका केही सिनेमा हलहरूमा विद्यालयका विद्यार्थीहरूले समूहमा फिल्म हेर्न थालेपछि दर्शकमाझ सकारात्मक वातावरण बनेको देखिएको छ। यही सन्दर्भमा फिल्मको निर्माण संस्था सेभेन सीज सिनेमा प्रालिले बिहीबार सामाजिक सञ्जालमार्फत माफीनामा सार्वजनिक गरेको हो।

कम्पनीका अध्यक्ष विनोद पौडेलद्वारा हस्ताक्षरित उक्त माफीनामामा सुरुवाती चरणमा फिल्मलाई विशेष रूपमा विद्यार्थी वर्गलाई लक्षित गरी निर्माण गरिएको शैक्षिक चलचित्रका रूपमा प्रस्तुत गरिएको विषयप्रति क्षमायाचना गरिएको उल्लेख छ।

निर्माता पौडेलले फिल्म ‘रोल नं १’ विद्यार्थी जीवन, अभिभावकको भूमिका तथा समाजमा सकारात्मक सोच विकास गर्ने उद्देश्यसहित तयार गरिएको स्पष्ट पारेका छन्।

माफीनामामा प्रारम्भिक रूपमा फिल्मलाई मुख्य रूपमा विद्यार्थी वर्गलाई लक्षित शैक्षिक चलचित्रका रूपमा प्रस्तुत गरिएको भए पनि प्रदर्शनपछि प्राप्त दर्शक प्रतिक्रिया, सुझाव र अनुभवका आधारमा अब यो फिल्म केवल विद्यार्थीका लागि मात्र नभई अभिभावक, शिक्षक तथा समाजका सम्पूर्ण जिम्मेवार व्यक्तिहरूले हेर्नुपर्ने महत्वपूर्ण चलचित्र भएको निष्कर्षमा पुगेको उल्लेख गरिएको छ।

निर्माण संस्थाले फिल्मप्रति देखाइएको चासो र सुझावप्रति धन्यवाद व्यक्त गर्दै शिक्षा क्षेत्रसँग सम्बन्धित सबैलाई फिल्म ‘रोल नं १’ हेर्न हार्दिक अनुरोधसमेत गरेको छ।