काठमाडौं । अभिनेता तथा निर्देशक विराज भट्ट आफ्नो व्यावसायिक रूपमा सफल एक्सन फिल्म ‘१२ गाउँ’को सिक्वेल ‘१२ गाउँ २’ लिएर दर्शकमाझ आउने भएका छन्। निर्माण टिमले फिल्मलाई आगामी दशैंको फूलपातीको अवसरमा प्रदर्शन गर्ने तयारी गरेको छ।

विराज भट्टकै निर्देशनमा निर्माण भइरहेको फिल्मको छायांकन गीतबाट सुरु गरिएको छ। काठमाडौं, सिन्धुपाल्चोक र चितवनलगायत विभिन्न स्थानमा छायांकन हुने फिल्मले पहिलो श्रृंखलाले दर्शकमाझ बनाएको लोकप्रियतालाई निरन्तरता दिने निर्माण पक्षको विश्वास छ।

फिल्मको अर्को आकर्षण वरिष्ठ अभिनेता राजेश हमालको पुनरागमन हो। लामो समयदेखि नेपाली चलचित्रबाट टाढिएका हमाल करिब दुई दशकपछि यही फिल्ममार्फत नेपाली रजतपटमा फर्किन लागेका छन्। ‘बाटुली’, ‘जय शिव शंकर’ र ‘म छुनी तिम्रो’ जस्ता चलचित्रमा अभिनय गरेका हमालको पुनरागमनलाई लिएर दर्शकमाझ उत्सुकता देखिएको छ।

पहिलो भागमा विराज भट्टको किक लागेर नाक भाँचिएको दृश्यका कारण चर्चामा आएका कलाकार कालु राना पनि सिक्वेलमा देखिने भएका छन्। निर्माण टिमका अनुसार उनको पात्रलाई दोस्रो भागमा पनि निरन्तरता दिइनेछ।

फिल्ममा विराज भट्टसँगै समिर भट्ट, अनुपविक्रम शाही, काफिया शाही, वर्षा इटानी, खुशी कार्की, प्रकाश शाह, सुनिल पोखरेल, कनिज कोइराला, पुष्कर भट्ट, शिवकुमार सिंह, साहित सिंह ठकुरी र पूर्णबहादुर गन्धर्वलगायत कलाकारको अभिनय रहनेछ।

फिल्मको कथा तथा पटकथा सन्तोष सरकारले तयार पारेका छन्। संगीत युग भुसाल, देवेन्द्र बराल र डीपी खनालको रहनेछ भने गायनमा सुगम पोखरेल, समीक्षा अधिकारी, प्रेरणा सिंह, किरण भुजेल र निशान भट्टराईको स्वर सुन्न पाइनेछ। फिल्मका डीओपी महेश पौडेल हुन्।

एक्सन, ड्रामा र पारिवारिक भावनाको मिश्रण रहने बताइएको ‘१२ गाउँ २’ को वितरण उपत्यकाभित्र काफिया फिल्म्स प्रालिले तथा उपत्यकाबाहिर कुबेर फिल्म्सले गर्ने निर्माण टिमले जनाएको छ।