जुम्ला । जुम्ला पूर्णखोप सुनिश्चितता तथा दिगोपना जिल्ला घोषणा भएको छ।

जिल्ला खोप समन्वय समितिले आयोजना गरेको कार्यक्रममा एक नगरपालिका र सात गाउँपालिकासहित आठवटै स्थानीय तहलाई पूर्णखोप सुनिश्चितता तथा दिगोपनायुक्त घोषणा गरिएको हो।

जनस्वास्थ्य सेवा कार्यालय जुम्लाका प्रमुख किरणकुमार शर्माका अनुसार चालु आर्थिक वर्षमा १५ महिनासम्मका दुई हजार ६८ र १६ देखि २३ महिनासम्मका तीन हजार ३६४ बालबालिकाले सबै प्रकारका खोप प्राप्त गरेपछि जिल्लालाई पूर्णखोप सुनिश्चितता तथा दिगोपना जिल्ला घोषणा गरिएको हो।

कार्यक्रममा प्रमुख जिल्ला अधिकारी दीपककुमार पौडेलले बालबालिकाको स्वास्थ्य सुरक्षाका लागि नियमित खोप अपरिहार्य रहेको बताए। जिल्ला खोप समन्वय समितिका संयोजक गौरीनन्द आचार्यले महिला स्वास्थ्य स्वयंसेविका, स्वास्थ्यकर्मी र स्थानीय तहको योगदानले अभियान सफल भएको बताए।

जिल्लाभर ८९ वटा खोप केन्द्र सञ्चालनमा रहेका छन्। कार्यक्रममा आठवटै स्थानीय तहका स्वास्थ्य शाखालाई सम्मान गरिएको थियो।