पाल्पा । पाल्पाको रम्भा गाउँपालिकाले सुनौलो हजार दिन कार्यक्रमअन्तर्गत उत्कृष्ट स्वास्थ्य अभ्यास अपनाएका १५ जना आमालाई ‘स्मार्ट आमा’ घोषणा गर्दै सम्मान गरेको छ।

स्वस्थ आमा, स्वस्थ शिशु र पोषणमैत्री समाज निर्माण गर्ने उद्देश्यले सञ्चालन गरिएको प्रतिस्पर्धामा उत्कृष्ट अंक प्राप्त गर्ने आमाहरूलाई नगद, स्वास्थ्य सामग्री र सम्मानपत्र प्रदान गरिएको हो।

गाउँपालिकाले २२ वटा स्वास्थ्य सूचकका आधारमा मूल्याङ्कन गरी प्रत्येक सूचकका लागि पाँच अंक निर्धारण गरेको थियो। सबै सूचक पूरा गर्दै ११० अंक प्राप्त गर्ने आमाहरूलाई ‘स्मार्ट आमा’ घोषणा गरिएको गाउँपालिकाका अध्यक्ष विष्णुप्रसाद भण्डारीले जानकारी दिए।

सम्मानित आमाहरूलाई दोषल्ला ओढाएर जनही १० हजार रुपैयाँ नगद तथा स्वास्थ्य सामग्री प्रदान गरिएको छ। अध्यक्ष भण्डारीका अनुसार यो अभियानले मातृ तथा शिशु स्वास्थ्य सुधार गर्दै रम्भा गाउँपालिकालाई पोषणमैत्री स्थानीय तहका रूपमा विकास गर्न सहयोग पुग्ने अपेक्षा गरिएको छ।

‘स्मार्ट आमा’ छनोटका लागि स्वास्थ्य संस्थामै प्रसूति गराएको, गर्भवती भएको पुष्टि भएपछि फोलिक एसिड सेवन सुरु गरेको, गर्भावस्थामा नियमित स्वास्थ्य परीक्षण गराएको, टिटी खोप लगाएको, आइरन तथा क्याल्सियमको निर्धारित मात्रा सेवन गरेको, शिशुको जन्मतौल २.५ किलोग्रामभन्दा बढी भएको, पूर्ण स्तनपान गराएको, समयमै पूरक आहार सुरु गरेको तथा राष्ट्रिय प्रोटोकलअनुसार सबै खोप लगाएको लगायतका सूचक समावेश गरिएको थियो।

त्यस्तै, शिशुको नियमित तौल र उचाइ मापन, भिटामिन ‘ए’, बालभिटा तथा जुकाको औषधि सेवन, आमा र शिशुको नियमित सरसफाइ, कम्तीमा दुई वर्षको गर्भान्तर, कुपोषणमुक्त अवस्था, धूमपान तथा मद्यपान नगर्ने बानी, शिशुको जन्मदर्ता, महिनावारी स्वच्छतासम्बन्धी ज्ञानलगायतका स्वास्थ्य मापदण्ड पनि मूल्याङ्कनका आधार बनेका थिए।

गाउँपालिकाका अनुसार यस वर्ष १३८ जना आमा प्रतिस्पर्धामा सहभागी भएका थिए। तीमध्ये सबै २२ वटा स्वास्थ्य सूचक पूरा गर्न सफल १५ जना आमालाई मात्रै ‘स्मार्ट आमा’का रूपमा सम्मान गरिएको हो।

रम्भा गाउँपालिकाले यस कार्यक्रमलाई निरन्तरता दिँदै मातृ तथा शिशु स्वास्थ्य सुधार, पोषण प्रवर्द्धन र स्वास्थ्यप्रति समुदायको चेतना अभिवृद्धि गर्ने लक्ष्य लिएको जनाएको छ।