काठमाडौं। राहदानी विभाग अगाडि आत्मदाह गरेका मुगुका २५ वर्षीय गणेश नेपालीको उपचारका क्रममा निधन भए पनि उनका बुबाआमालाई अहिलेसम्म मृत्युको खबर सुनाइएको छैन।

घटना थाहा पाएलगत्तै सरकारको समन्वयमा जहाजमार्फत मुगुबाट काठमाडौं ल्याइएका उनीहरू अहिले पनि वीर अस्पतालको जलन वार्डमा छोरा निको हुने आशामा प्रतीक्षारत छन्।

गणेशका दाजु मदन नेपालीका अनुसार बुबाआमाको स्वास्थ्य अवस्थालाई ध्यानमा राख्दै परिवारले मृत्युको खबर गोप्य राखेको हो।

‘बुबाको स्वास्थ्य पनि राम्रो छैन। हिजो गणेश जलेको खबर सुन्नेबित्तिकै उहाँ बेहोस हुनुभएको थियो। त्यसैले मृत्युको कुरा अहिलेसम्म भनेका छैनौं,’ उनले भने।

मदनका अनुसार ६२ वर्षीय बुबाको स्वास्थ्य कमजोर रहेकाले एक्कासि मृत्युको खबर सुनाउँदा थप समस्या आउन सक्ने चिन्ताका कारण परिवारले उनीहरूलाई गणेशको उपचार भइरहेको जानकारी मात्रै दिएको छ।

परिवारलाई गणेशको शरीर धेरै जलेको र उनी सघन उपचार कक्ष (आईसीयू) मा उपचाररत रहेको भनिएको छ। तर, गणेशको शव भने वीर अस्पतालमा छैन। परिवारका अनुसार शव बिहीबार राति नै वीर अस्पतालबाट महाराजगञ्जस्थित शिक्षण अस्पताल लगिएको छ।

गणेशका बुबाआमा भने अझै वीर अस्पतालमै रहेका छन्। काठमाडौंका प्रमुख जिल्ला अधिकारी (सीडीओ) समेत उनीहरूलाई भेट्न अस्पताल पुगेका थिए। अस्पताल प्रशासन र सरकारी निकायसँग हुने समन्वय तथा संवाद गणेशका दाजु मदनले गरिरहेका छन् भने बुबाआमालाई ती प्रक्रियामा सहभागी गराइएको छैन।

मदन नेपालीले आफूहरूले अहिलेसम्म शव नबुझेको र सरकारी पक्षसँग औपचारिक वार्ता पनि सुरु नभएको जानकारी दिए।

साथै, शव अहिले कहाँ राखिएको छ भन्नेबारे पनि परिवारलाई औपचारिक जानकारी नदिइएको उनले बताए।