काठमाडौं – राष्ट्रिय प्रजातन्त्र पार्टीका नेता ज्ञानेन्द्र शाहीले प्रधानमन्त्री बालेन शाहको पनि सम्पत्ति छानबिन हुनुपर्ने बताएका छन् । सोमबार बुटवलमा पत्रकारहरूसँग कुराकानी गर्दै उनले यस्तो बताएका हुन् । उनले बहालवाला प्रधानमन्त्री, मन्त्री र सांसदहरूको समेत सम्पत्ति छानबिन हुनुपर्ने माग गरे।

शाहीले सरकारले आफ्ना मान्छेहरूको सम्पत्ति लुकाएर अरूको मात्रै छानबिन गर्नु गलत भएको बताए । जागिर वा कुनै ठूलो व्यवसाय विना नै राजनीतिक नेतृत्वमा रहेका धेरै व्यक्तिहरूसँग करोडौँदेखि अर्बौँ रुपैयाँसम्मको सम्पत्ति कहाँबाट आयो भन्दै आम नागरिकले प्रश्न गरिरहेको उनकोे भनाइ थियो ।

रास्वपाका नेताहरू समेत अर्बपति देखिएको टिप्पणी गर्दै उहाँले सम्पत्ति छानबिनको दायरा सबैका लागि समान हुनुपर्नेमा जोड दिए । प्रधानमन्त्री बालेन्द्र शाहतर्फ इङ्गित गर्दै नेता शाहीले पूर्वमेयरहरूको सम्पत्ति छानबिन नगर्नुले सरकारको सुशासनको नारामाथि नै प्रश्न उठाएको बताए ।