जनकपुरधाम । तापक्रम वृद्धि भएसँगै जनकपुरधामस्थित जानकी आँखा अस्पतालमा आँखासम्बन्धी समस्या लिएर उपचारका लागि आउने बिरामीको सङ्ख्या उल्लेख्य रूपमा बढेको छ।

अस्पतालका अनुसार हाल दैनिक ४०० देखि ५०० जना बिरामी उपचारका लागि आउने गरेका छन्। यसअघि भने औसतमा दैनिक करिब ३०० जना सेवाग्राहीले अस्पतालको सेवा लिने गरेका थिए।

अस्पतालका निर्देशक डा. आशीष बोहराका अनुसार पछिल्ला दिनमा विशेषगरी बालबालिका र वृद्धवृद्धामा आँखासम्बन्धी समस्या बढी देखिएको छ। अत्यधिक गर्मी र धुलोधुवाँका कारण आँखामा संक्रमण, एलर्जी तथा अन्य समस्या लिएर अस्पताल आउने बिरामीको संख्या बढेको उनले बताए।

जानकी आँखा अस्पतालमा धनुषासँगै सिरहा, महोत्तरी, सिन्धुलीलगायत जिल्लाबाट पनि बिरामी उपचारका लागि आउने गरेका छन्। साथै, छिमेकी भारतको बिहार राज्यबाट समेत उल्लेख्य संख्यामा बिरामी उपचारका लागि अस्पताल पुग्ने गरेका छन्।