चितवन। नेपाल नेत्रज्योति सङ्घ चितवनद्वारा सञ्चालित भरतपुर आँखा अस्पताल र मातहतका अस्पताल तथा सेवा केन्द्रबाट गत आर्थिक वर्ष २०८२/०८३ मा तीन लाख ८१ हजारभन्दा बढी सेवाग्राहीले आँखा उपचार सेवा लिएका छन्।

अघिल्लो आर्थिक वर्षको तुलनामा सेवा लिनेको संख्या करिब १६ प्रतिशतले वृद्धि भएको अस्पतालले जनाएको छ।

अस्पतालका अनुसार एक वर्षमा भरतपुर आँखा अस्पतालबाट मात्रै एक लाख ७९ हजार २६ जनाले सेवा लिएका छन्। त्यसैगरी सिटी क्लिनिकमार्फत १९ हजार ५३८ जना र विभिन्न आँखा शिविरमार्फत ४२ हजार २७० जनाले परीक्षण तथा उपचार सेवा पाएका छन्।

विद्यालय लक्षित आँखा परीक्षण कार्यक्रम पनि उल्लेखनीय रूपमा विस्तार भएको छ। गत आर्थिक वर्षमा ४६ हजार ८५ विद्यार्थीको आँखा परीक्षण गरिएको छ, जुन अघिल्लो वर्षको तुलनामा ६० प्रतिशतभन्दा बढी वृद्धि हो।

मातहतका दुई सेकेन्डरी आँखा अस्पतालबाट २७ हजार ३५७, दुई सर्जिकल आई केयर सेन्टरबाट नौ हजार ४६४ तथा १९ वटा आँखा उपचार केन्द्रबाट ५७ हजार २८६ जनाले सेवा लिएका छन्।

शल्यक्रियातर्फ पनि अस्पतालले प्रगति गरेको छ। गत आर्थिक वर्षमा ११ हजार ६३९ जनाको आँखाको शल्यक्रिया गरिएको छ, जुन अघिल्लो वर्षको तुलनामा केही बढी हो।

अस्पताल व्यवस्थापनका अनुसार विशिष्टीकृत आँखा उपचार सेवा, विशेषज्ञ जनशक्ति र सेवा विस्तारका कारण बिरामीको आकर्षण बढ्दै गएको छ। यही आवश्यकतालाई मध्यनजर गर्दै सर्लाहीको हरिपुर र धादिङको नेत्रावतीमा नयाँ आँखा उपचार केन्द्र सञ्चालन गर्ने तयारी पनि अघि बढाइएको छ।

हाल भरतपुर आँखा अस्पतालअन्तर्गत कावासोती र पर्साको ठोरीमा सेकेन्डरी आँखा अस्पताल, चोरमारा र सर्लाहीको ईश्वरपुरमा सर्जिकल आई केयर सेन्टर, भरतपुरमा सिटी क्लिनिक तथा विभिन्न जिल्लामा १९ वटा आँखा उपचार केन्द्र सञ्चालनमा रहेका छन्।