काठमाडौं। पूर्वप्रधानमन्त्री डा. बाबुराम भट्टराई स्वास्थ्यमा अचानक समस्या देखिएपछि काठमाडौंको टोखास्थित ग्राण्डी अन्तर्राष्ट्रिय अस्पतालमा भर्ना भएका छन्।

उनको सचिवालयका अनुसार शनिबार साँझ अचानक तीव्र चक्कर लाग्ने र वान्ता हुने समस्या देखिएपछि उनलाई अस्पताल लगिएको थियो। आइतबार जारी प्रेस विज्ञप्तिमा उपचारमा संलग्न चिकित्सकहरूले डा. भट्टराईमा भित्री कानसँग सम्बन्धित सामान्य तर असहज समस्या ‘बेनाइन प्यारोक्सिज्मल पोजिसनल भर्टिगो’ को लक्षण देखिएको बताएका छन्।

सचिवालयका अनुसार हाल डा. भट्टराईको स्वास्थ्य अवस्था सुधारोन्मुख छ र उनी चिकित्सकहरूको प्रत्यक्ष निगरानीमा उपचाररत छन्। स्वास्थ्य परीक्षणका अन्य सबै रिपोर्ट भने सामान्य रहेको जनाइएको छ।

डा. भट्टराईको स्वास्थ्यप्रति चासो व्यक्त गर्दै शीघ्र स्वास्थ्य लाभको कामना गर्ने सबै शुभेच्छुक, आफन्त तथा मित्रप्रति सचिवालयले आभार व्यक्त गरेको छ।