काठमाडौं । श्रम संस्कृति पार्टीका सांसद आरेन राईले प्रधानमन्त्री बालेन शाह नेतृत्वको सरकार वर्तमान परिस्थितिप्रति गम्भीर नभएको आरोप लगाउँदै जिम्मेवारी निर्वाह गर्न नसके मार्ग प्रशस्त गर्न आग्रह गरेका छन्।

बिहीबार प्रतिनिधिसभाको बैठकमा बोल्दै राईले सरकार बाहिर निस्किएर सूचना संकलन, जनतासँग संवाद र शान्ति–सुरक्षा कायम गर्न सक्रिय हुनुपर्ने बताए।

उनले भने, ‘यदि प्रधानमन्त्रीले अथवा अहिलेको सरकारले देश चलाउन नसक्ने अवस्था हो भने हात ठड्याए हुन्छ। त्यो पाइन्छ, गर्न सकिन्छ।’

सरकारले अभिभावकीय भूमिका निर्वाह गर्न नसकेको आरोप लगाउँदै राईले भने, ‘यो ढंगले अभिभावकविहीन बनेर देश चलाउन पाइँदैन। देश र जनतालाई यसरी टुहुरो बनाउन पाइँदैन।’

उनले सरकारलाई सक्रिय रूपमा काम गर्न वा देश चलाउन नसक्ने स्वीकार गर्दै जिम्मेवारीबाट पछि हट्न आग्रह गरे। ‘सरकार कि त निस्किनुपर्‍यो, कि त सक्तिनँ भनेर हात ठडाउनुपर्‍यो,’ राईले भने।