काठमाडौं। पछिल्लो समय सुनसरी घटनापछि सामाजिक सद्भावमा देखिएको तनावप्रति ऐक्यबद्धता जनाउँदै त्रिचन्द्र बहुमुखी क्याम्पसका विद्यार्थीहरूले शुक्रबार शान्ति र राष्ट्रिय एकताको सन्देश दिएका छन्।

विद्यार्थीहरूले आ-आफ्नो धार्मिक आस्थालाई प्रतिनिधित्व गर्ने पोशाक लगाएर सामूहिक रूपमा राष्ट्रिय गान गाएका थिए। विभिन्न धर्म, जात, भाषा र समुदायका विद्यार्थी एकै स्थानमा भेला भएर राष्ट्रिय एकता, धार्मिक सहिष्णुता र सामाजिक सद्भाव कायम राख्नुपर्ने सन्देश दिएका हुन्।

कार्यक्रममा सहभागी विद्यार्थीहरूले सुनसरीलगायत पछिल्ला घटनाले मुलुकको सहिष्णुता र भ्रातृत्वमा चुनौती सिर्जना गरेको उल्लेख गर्दै त्यसको समाधान आपसी सम्मान, सद्भाव र एकतामार्फत मात्रै सम्भव हुने बताएका छन्।

उनीहरूले नेपालका विद्यार्थी र युवा कुनै पनि धर्म, जात, भाषा वा लिङ्गका आधारमा विभाजित नभएको बताउँदै शान्ति, सहअस्तित्व र एकअर्काको समुन्नतिका पक्षमा उभिएको सन्देश दिएका छन्।