काठमाडौं । नेपाल चिकित्सक सङ्घले भक्तपुर अस्पतालमा भएको तोडफोड तथा चिकित्सक र स्वास्थ्यकर्मीमाथि भएको आक्रमणप्रति गम्भीर आपत्ति जनाएको छ।

सघन उपचार कक्षमा बिरामी भर्ना नगरिएको विषयलाई लिएर अस्पताल परिसरमै तोडफोड गर्नुका साथै ड्युटीमा रहेका चिकित्सक तथा स्वास्थ्यकर्मीमाथि हातपात गरिएको घटनाले स्वास्थ्य संस्थाको सुरक्षामाथि गम्भीर प्रश्न उठाएको सङ्घले जनाएको छ।

सङ्घले घटनालाई अमानवीय, निन्दनीय र आपराधिक गतिविधिको संज्ञा दिँदै संलग्न व्यक्तिमाथि तत्काल कानुनी कारबाही गर्न माग गरेको छ। स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन, २०६६ (पहिलो संशोधन, २०७९) अनुसार दोषीलाई कडा कारबाही गर्न सम्बन्धित निकायलाई आग्रह गरिएको छ।

सङ्घका अनुसार स्वास्थ्य संस्थामा उपचारका क्रममा असन्तुष्टि वा विवाद उत्पन्न भए संवाद र कानुनी प्रक्रियामार्फत समाधान खोजिनुपर्नेमा स्वास्थ्यकर्मीमाथि आक्रमण गर्ने र अस्पतालमा क्षति पुर्‍याउने गतिविधि बढ्नु गम्भीर विषय हो।

पछिल्लो समय स्वास्थ्य संस्थामा चिकित्सक तथा स्वास्थ्यकर्मीमाथि हुने दुर्व्यवहार, धम्की र आक्रमणका घटना बढ्दै गएको भन्दै सङ्घले चिन्ता व्यक्त गरेको छ। स्वास्थ्यकर्मीले सुरक्षित वातावरणमा काम गर्न पाउने अधिकार सुनिश्चित गर्न राज्यले शून्य सहनशीलताको नीति अपनाउनुपर्ने उसको माग छ।

स्वास्थ्य संस्था र स्वास्थ्यकर्मीलाई त्रसित बनाउने कुनै पनि गतिविधिमा संलग्न व्यक्तिलाई कडा कानुनी दायरामा ल्याउने व्यवस्था प्रभावकारी रूपमा कार्यान्वयन गर्न पनि सङ्घले सरकारसँग आग्रह गरेको छ।

हाल स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन संशोधनको प्रक्रियासमेत अघि बढिरहेको उल्लेख गर्दै सङ्घले प्रस्तावित कानुनी व्यवस्थालाई थप प्रभावकारी बनाउनुपर्नेमा जोड दिएको छ।

सङ्घका अध्यक्ष डा. बद्री रिजाल र महासचिव डा. विश्वराज दवाडीले जारी गरेको विज्ञप्तिमा स्वास्थ्य संस्थालाई सुरक्षित क्षेत्रका रूपमा स्थापित गर्न तथा स्वास्थ्यकर्मीमाथि हुने हिंसा नियन्त्रणका लागि तत्काल प्रभावकारी कदम चाल्न सरकारको ध्यानाकर्षण गराइएको छ।