‘तलब बढाऊ, ब्लड प्रेसर होइन’ भन्दै नर्स सडकमा
Nepal One HD १९ साउन २०८३ १४:४४
काठमाडौं। अनसनरत स्टाफ नर्स ज्योति रानाभाटको मागप्रति ऐक्यबद्धता जनाउँदै वीर अस्पतालमा कार्यरत नर्स तथा स्वास्थ्यकर्मीहरूले प्रदर्शन गरेका छन्।
मंगलबार अस्पताल परिसरमा भेला भएका उनीहरूले विभिन्न मागसहित प्लेकार्ड बोकेर शान्तिपूर्ण प्रदर्शन गरेका हुन्। प्रदर्शनका क्रममा नर्सहरूले आफूहरूले भोग्दै आएका समस्या र पेशागत अधिकारसँग सम्बन्धित विषयलाई उठाएका थिए।
प्रदर्शनमा सहभागी स्वास्थ्यकर्मीले ‘हामीलाई सरकार मात्र होइन, बिरामीले पनि सम्मान गर्दैनन्’, ‘हाम्रो ब्लड प्रेसर होइन, तलब बढाऊ’, ‘उन्नत नर्सिङ अभ्यासको विकास’ लगायतका नारासहितका प्लेकार्ड प्रदर्शन गरेका थिए।
नर्सहरूको पारिश्रमिक सम्बन्धित तहअनुसार निर्धारण हुनुपर्ने, श्रम शोषण अन्त्य गरिनुपर्ने तथा नर्सिङ शिक्षाको गुणस्तर सुधार गर्नुपर्नेलगायत माग राख्दै रानाभाट अनसनमा बसेकी हुन्।
रानाभाटले गत साउन १४ गतेदेखि नेपाल नर्सिङ काउन्सिल परिसरमा अनसन सुरु गरेकी थिइन्। लामो समयको अनसनका कारण स्वास्थ्य अवस्था बिग्रिएपछि उनलाई उपचारका लागि वीर अस्पताल लगिएको थियो।
हाल उनको वीर अस्पतालको सघन उपचार कक्ष (आईसीयू)मा उपचार भइरहेको छ।
अनसनरत नर्सको मागप्रति सरकार गम्भीर हुनुपर्ने र नर्सिङ क्षेत्रका समस्या समाधानका लागि ठोस पहल गर्नुपर्ने प्रदर्शनमा सहभागी स्वास्थ्यकर्मीहरूको माग छ।
तस्वीरहरू:
