काठमाडौं। बलिउडका वरिष्ठ अभिनेता प्रदीप रावतको निधन भएको छ। आमिर खान अभिनित चर्चित फिल्म ‘गजनी’मा खलनायक ‘गजनी धर्मात्मा’को भूमिकाबाट विशेष चर्चामा आएका रावतको मंगलबार साँझ ७४ वर्षको उमेरमा निधन भएको हो।

भारतीय सञ्चारमाध्यमका अनुसार लामो समयदेखि क्यान्सरसँग संघर्ष गरिरहेका रावतको मुम्बईस्थित अस्पतालमा उपचारका क्रममा निधन भएको हो। उनका प्रबन्धक सिद्धार्थ आर तिवारीका अनुसार रावत पछिल्लो एक महिनादेखि मुम्बईस्थित कोकिलावेन धिरुभाई अम्बानी अस्पतालमा उपचाररत थिए। केही समयअघि उनलाई भिवण्डीस्थित क्यान्सर अस्पतालमा सारिएको थियो।

रावतको निधनको खबर सार्वजनिक भएसँगै भारतीय फिल्म उद्योगमा शोक छाएको छ। कलाकार तथा उनका प्रशंसकहरूले सामाजिक सञ्जालमार्फत श्रद्धाञ्जली व्यक्त गरिरहेका छन्।

‘लगान’मा रावतसँग सहकार्य गरेका अभिनेता यशपाल शर्माले उनलाई ‘गजनी देवा’ भन्दै श्रद्धाञ्जली दिएका छन्। त्यस्तै, अभिनेता गजेन्द्र चौहानले ‘महाभारत’मा रावतले निर्वाह गरेको अश्वत्थामाको भूमिकालाई स्मरण गर्दै दुःख व्यक्त गरेका छन्।

प्रदीप रावत हिन्दी, तेलुगु र तमिल भाषाका चलचित्रमा सक्रिय थिए। विशेषगरी खलनायक तथा नकारात्मक पात्रलाई प्रभावशाली ढंगले प्रस्तुत गर्ने कलाकारका रूपमा उनले छुट्टै पहिचान बनाएका थिए।

उनले ‘सरफरोश’, ‘लगान’, ‘नायक’ र ‘गजनी’ लगायतका चर्चित चलचित्रमा स्मरणीय भूमिका निर्वाह गरेका छन्। आमिर खान अभिनित ‘गजनी’मा उनले निर्वाह गरेको ‘गजनी धर्मात्मा’को भूमिका उनको करिअरकै चर्चित भूमिकामध्ये एक बनेको थियो।

चलचित्रसँगै टेलिभिजनमा पनि उनको बलियो उपस्थिति थियो। बीआर चोपडाको चर्चित ‘महाभारत’ धारावाहिकमा अश्वत्थामाको भूमिका निर्वाह गरेर उनले दर्शकमाझ छुट्टै पहिचान बनाएका थिए।

उनको पछिल्लो चलचित्र ‘चाभा’ रहेको जनाइएको छ। उक्त चलचित्रमा उनले यसाजी कांकको भूमिका निर्वाह गरेका थिए।

प्रदीप रावतले नेपाली चलचित्रमा समेत अभिनय गरेका थिए। पल शाह र विपना थापा अभिनित नेपाली चलचित्रमा उनको सहभागिता रहेको थियो।

लामो समय भारतीय चलचित्र उद्योगमा सक्रिय रहेका रावतले हिन्दी, तेलुगु र तमिलसहित विभिन्न भाषाका चलचित्रमा अभिनय गरेका थिए। विशेषगरी नकारात्मक पात्रलाई प्रभावशाली ढंगले प्रस्तुत गर्ने उनको अभिनय शैली दर्शकमाझ लोकप्रिय थियो।

रावतको निधनसँगै भारतीय चलचित्र उद्योगले अनुभवी कलाकार गुमाएको छ। उनका परिवारमा पत्नी कल्याणी रावत र छोरा विक्रमादित्य रावत रहेका छन्।