काठमाडौं। श्रम संस्कृति पार्टीका सांसद ध्रुवराज राईले प्रतिनिधिसभाको कार्यशैली र प्रभावकारितामाथि प्रश्न उठाएका छन्। उनले लामो समयदेखि संसद्मा भइरहेको अवरोध र निष्कर्षविहीन छलफलले जनतामा नकारात्मक सन्देश गएको बताएका  हुन्।

शुक्रबार प्रतिनिधिसभाको बैठकमा बोल्दै राईले जनप्रतिनिधिले नागरिकको अपेक्षाअनुसार काम गर्न नसकेकोमा चिन्ता व्यक्त गरे। संसद्मा समस्या समाधानका लागि ठोस पहल हुन नसकेको भन्दै उनले राजनीतिक दल र सरकारलाई निकास खोज्न आग्रह गरे।

‘जनताले तपाईं हामीलाई, हामी नेपाली जनताका प्रतिनिधि भएर आएकाहरूलाई कुरीकुरी गरिरहेका छन्,’ उनले भने, ‘समस्याको समाधान नखोज्ने हो भने कतिञ्जेल यसरी नै कराउँदै बस्ने ?’

सांसद राईले संसद्को बैठकमा एक जना सांसदले केही मिनेट मात्रै बोल्दा पनि ठूलो समय खर्च हुने भएकाले त्यसतर्फ जनप्रतिनिधि गम्भीर हुनुपर्ने बताए।

उनका अनुसार दुईदेखि अढाई महिनासम्म पनि संसद्ले कुनै ठोस निष्कर्ष निकाल्न नसक्नु दुःखद अवस्था हो। लामो समयसम्म एउटै विषयमा बहस र विरोध भइरहँदा संसद्को मूल जिम्मेवारी प्रभावित हुने उनको भनाइ थियो।

‘कति वर्षसम्म यसरी छलफल गरिरहने ? हामी सकिञ्जेलसम्म यसरी नै कराउँदै बस्ने हो ?’ उनले प्रश्न गरे।

राईले सभामुखमार्फत सरकार तथा राजनीतिक दलका शीर्ष नेताहरूलाई संसद्मा देखिएको गतिरोध अन्त्य गर्न पहल गर्न आग्रह गरे। उनले राजनीतिक असहमति र विवादलाई निरन्तर तन्काउनुको साटो समाधानको बिन्दु पहिल्याउनुपर्ने बताए।

‘संसद्लाई अन्धकार र लत्तरपत्तर बनाएर फेरि पनि दुर्गन्धित नबनाऔँ,’ उनले भने, ‘यो समस्याको एउटा समाधानको बिन्दु खोजौँ। कतै त उज्यालो होला नि ?’

संसद्को समयलाई प्रभावकारी रूपमा उपयोग गर्दै जनतासँग जोडिएका विषयमा परिणाममुखी काम गर्नुपर्नेमा उनले जोड दिए।