काठमाडौं । नेकपा एमालेकी सांसद भूमिका लिम्बू सुब्बाले पाँचथर जिल्लामा फैलिएको रेबिज संक्रमणप्रति सरकारको गम्भीर ध्यानाकर्षण गराउँदै तत्काल नियन्त्रणका लागि प्रभावकारी कदम चाल्न माग गरेकी छन् ।

शुक्रबार प्रतिनिधि सभाको बैठकको शून्य समयमा बोल्दै उनले पाँचथरको फाल्गुनन्द गाउँपालिकामा रेबिज संक्रमित कुकुरको टोकाइबाट सयौँ पशुचौपाय संक्रमित भएको र हालसम्म ३५ भन्दा बढी पशु मरेको जानकारी दिइन् । उनका अनुसार फिदिममा तीन जना मानिस, ५५ भन्दा बढी कुकुर तथा एउटा भैंसीमा समेत रेबिज संक्रमण पुष्टि भइसकेको छ । हिलिहाङ र कुम्मायक गाउँपालिकामा पनि संक्रमण देखिन थालेपछि जिल्लाभर त्रास फैलिएको उनले बताइन् ।

‘रेबिज संक्रमित कुकुरको र्यालबाट पनि संक्रमण हुने भएकाले किसानहरूले सावधानीका लागि जुत्ता, मास्क र ग्लोभ्स प्रयोग नगर्दा संक्रमण अझ फैलिएको अनुमान गरिएको छ,’ सांसद सुब्बाले भनिन् ।

उनले सरकारले तत्काल घरघरमा स्वास्थ्यकर्मी परिचालन गरी किसानहरूको स्वास्थ्य परीक्षण तथा आवश्यक उपचारको व्यवस्था गर्नुपर्ने माग गरिन् । साथै, छाडा कुकुरहरूको नियन्त्रण, रेबिजविरुद्धको खोप व्यवस्थापन र जनचेतनामूलक अभियान सञ्चालनलाई प्राथमिकतामा राख्न सरकारसँग आग्रह गरिन्।

‘म सरकारसँग जोडदार माग गर्दछु कि घरघरमै स्वास्थ्यकर्मी पठाइ किसानहरूको स्वास्थ्य परीक्षण गरी उपचारको व्यवस्था मिलाइयोस् । छाडा कुकुरहरूको नियन्त्रण चाँडो गरियोस् र संक्रमण रोक्न जनचेतनामूलक अभियान चलाइयोस्,’ उनले भनिन्।