काठमाडौं। निर्देशक सम्राट बस्नेतले आफ्नो आगामी फिल्म ‘दुर्गा’ निर्माण गर्ने घोषणा गरेका छन्। फिल्मको थिम पोस्टर सार्वजनिक गर्दै उनले नयाँ चलचित्रबारे जानकारी दिएका हुन्।

मिथोलोजिकल कथामा आधारित हुने बताइएको फिल्मको सार्वजनिक पोस्टरले धार्मिक तथा रहस्यमय कथाको संकेत गरेको छ। पोस्टरमा दुर्गा मन्दिरको अगाडि रातो पहिरनमा एक युवती उभिएको देखिन्छ। मन्दिरको प्रवेशद्वारमा राखिएको त्रिशूलले पनि फिल्ममा धार्मिक पक्ष महत्वपूर्ण हुने अनुमान गर्न सकिन्छ।

निर्माण पक्षले भने अहिलेसम्म फिल्मको कथावस्तु र मुख्य पात्रबारे विस्तृत विवरण सार्वजनिक गरेको छैन। कलाकार तथा प्राविधिक टोलीको नाम पनि तत्काल सार्वजनिक नगरिएको जनाइएको छ।

‘कुस्मण्डा’ र ‘ग्लोबल रिल मोसन पिक्चर्स’को ब्यानरमा निर्माण हुने फिल्मको कथा निश्चल ढुंगानाले लेखेका हुन्। निर्माण टोलीका अनुसार चलचित्रको छायांकन करिब ९० दिनमा पूरा गर्ने योजना छ।

फिल्मको छायांकन काठमाडौं, पोखरा र चितवनका विभिन्न स्थानमा गरिनेछ। निर्माण पक्षले असोजको पहिलो सातादेखि छायांकन सुरु गर्ने तयारी गरेको जनाएको छ।

निर्देशक बस्नेतको पछिल्लो चलचित्र ‘लाखे’ केही समयअघि युट्युबमार्फत सार्वजनिक भएको थियो। अब ‘दुर्गा’मार्फत उनले मिथोलोजिकल विधामा नयाँ प्रयोग गर्न लागेका हुन्।\