काठमाडौं । नेपाली फिल्म ‘गौंथली’ले प्रदर्शनको क्रममा आक्रामक व्यापारलाई निरन्तरता दिइरहेको छ।

फिल्मले आइतबार दिउँसोसम्म १९ करोड ४५ लाख रुपैयाँ ग्रस कलेक्सन गरेको निर्माण पक्षले जनाएको छ।

उक्त रकममध्ये फिल्मको नेट कलेक्सन करिब १७ करोड रुपैयाँ पुगेको बताइएको छ। करिब २ करोड ७५ लाख रुपैयाँको लगानीमा निर्माण भएको फिल्मले छोटो समयमै लगानीको तुलनामा निकै ठूलो व्यापार गर्न सफल भएको हो।

आइतबार सार्वजनिक बिदा परेकाले फिल्मको व्यापार अझ बढ्ने अपेक्षा निर्माण पक्षको छ। दिनको बाँकी समयको व्यापारसमेत जोड्दा ‘गौंथली’को ग्रस कलेक्सन २० करोड रुपैयाँ आसपास पुग्न सक्ने अनुमान गरिएको छ।

फिल्मले दर्शकको उपस्थितिमा पनि उल्लेख्य सफलता हासिल गरेको छ। आइतबार दिउँसोसम्म ७ लाखभन्दा बढी दर्शकले ‘गौंथली’ हेरेको निर्माण पक्षले जनाएको छ। दर्शकको निरन्तर साथ र हलमा कायम रहेको अकुपेन्सीका कारण फिल्मको व्यापार थप उकालो लाग्ने अपेक्षा गरिएको छ।

‘गौंथली’ले यसअघि नै केही चर्चित नेपाली फिल्मको व्यापारिक रेकर्डलाई पछाडि पारिसकेको छ। पछिल्लो शनिबारसम्म फिल्मले ‘जारी’, ‘छक्कापञ्जा ४’ र ‘परान’को कमाइलाई उछिनेको बताइएको छ।

अब फिल्मको लक्ष्य नेपाली फिल्मको सर्वाधिक कमाइको सूचीमा अझ माथि पुग्नु रहेको देखिन्छ।  १२ गाउँ’ले १९ करोड ९२ लाख रुपैयाँ ग्रस कलेक्सन गरेको तथ्यांकलाई ‘गौंथली’ले छिट्टै पार गर्न सक्ने अनुमान गरिएको छ। आइतबारको व्यापारको गति हेर्दा आज वा भोलिसम्मै उक्त आँकडा पार हुनसक्ने निर्माण पक्षको अपेक्षा छ।

त्यसपछि नेपाली फिल्मको सर्वाधिक कमाइ गर्ने सूचीमा ‘गौंथली’भन्दा अगाडि ‘कबड्डी ४’ र ‘पूर्णबहादुरको सारंगी’ रहनेछन्।

यसरी हेर्दा फिल्मले नेपाली चलचित्रको बक्स अफिसमा नयाँ उपलब्धि थप्ने सम्भावना बलियो देखिएको छ।

घरेलु बजारमा राम्रो प्रदर्शन गरिरहेको ‘गौंथली’ले विदेशमा रहेका नेपाली दर्शकबाट समेत सकारात्मक प्रतिक्रिया र राम्रो व्यापार पाइरहेको निर्माता सुमन गिरीले बताएका छन्।

निर्माता गिरीका अनुसार फिल्मले अमेरिकामा मात्रै करिब २ लाख अमेरिकी डलरको व्यापार गरेको छ। त्यस्तै अस्ट्रेलियामा करिब १ लाख अस्ट्रेलियन डलर तथा दुबईमा करिब ५० हजार दिराम कमाएको उनको भनाइ छ।

डेनमार्क, माल्टा लगायतका युरोपेली बजारबाट पनि फिल्मले करिब २० हजार युरो आम्दानी गरिसकेको निर्माता गिरीले जानकारी दिएका छन्।

विदेशी बजारमा समेत दर्शकको माग कायम रहेकाले फिल्मको अन्तर्राष्ट्रिय कमाइ अझ बढ्ने निर्माण पक्षको अपेक्षा छ।

निर्माता गिरीका अनुसार ‘गौंथली’ अब क्यानडामा समेत प्रदर्शनमा आउने तयारीमा छ। क्यानडामा फिल्मको प्रदर्शन अर्को साताबाट सुरु गर्ने तयारी गरिएको उनले बताएका छन्।

नेपालमा प्राप्त भएको दर्शकीय प्रतिक्रिया र विदेशमा देखिएको व्यापारिक सम्भावनाले फिल्मको कुल आम्दानी अझ माथि पुग्ने अपेक्षा गरिएको छ।

कम लगानीमा निर्माण भएको फिल्मले छोटो समयमै उल्लेख्य व्यापार गर्न सफल भएपछि ‘गौंथली’ अहिले नेपाली फिल्म बजारमा चर्चाको विषय बनेको छ।

घरेलु तथा अन्तर्राष्ट्रिय बजारमा यसको प्रदर्शन अझै जारी रहेकाले अन्तिम कमाइ कति पुग्छ भन्ने विषयमा दर्शक तथा फिल्म क्षेत्रको चासो बढेको छ।