काठमाडौं। सशस्त्र प्रहरी परिवार महिला सङ्घले पशुपतिनाथ मन्दिर परिसरमा दर्शनका लागि आउने भक्तजनलाई लक्षित गर्दै निःशुल्क स्वास्थ्य शिविर सञ्चालन गरेको छ।

साउन महिनाको प्रत्येक सोमबार सञ्चालन हुँदै आएको शिविरमा नेपाल एपीएफ अस्पतालका चिकित्सकसहितको टोलीले भक्तजनको निःशुल्क स्वास्थ्य परीक्षण गर्दै आएको छ।

शिविरमा स्वास्थ्य परीक्षणसँगै आवश्यक औषधि र खानेपानीसमेत निःशुल्क वितरण गर्ने व्यवस्था मिलाइएको छ।

यसैगरी, साउन महिनाभर प्रत्येक सोमबार पशुपतिनाथ मन्दिरमा आउने दर्शनार्थीको सुरक्षालाई ध्यानमा राख्दै बागमती किनारमा विपद् व्यवस्थापन टोलीलाई तयारी अवस्थामा राखिएको छ। १० सदस्यीय टोलीलाई र्‍याफ्ट बोट तथा आवश्यक उद्धार सामग्रीसहित तत्काल परिचालन गर्न सकिने गरी तयारी अवस्थामा राखिएको जनाइएको छ।