दाङ । राप्ती स्वास्थ्य विज्ञान प्रतिष्ठानले स्वास्थ्य बीमा सेवामार्फत उपचारका लागि आउने सेवाग्राहीको चाप व्यवस्थापन गर्न ओपीडी टिकट काउन्टर थप गरेको छ।

यसअघि दुई वटा काउन्टरबाट टिकट वितरण हुँदै आएकोमा सेवाग्राहीको संख्या बढेपछि थप एक काउन्टर सञ्चालनमा ल्याइएको हो। अब प्रतिष्ठानमा स्वास्थ्य बीमा सेवाका लागि तीन वटा ओपीडी टिकट काउन्टर सञ्चालनमा रहेका छन्।

प्रतिष्ठानका निमित्त अस्पताल निर्देशक तथा सहप्राध्यापक डा. सुरेश रसाइलीका अनुसार सेवाग्राहीलाई छिटो, सहज र व्यवस्थित रूपमा सेवा उपलब्ध गराउने उद्देश्यले काउन्टर थप गरिएको हो।

उनले सेवाग्राहीको चापअनुसार सेवा प्रवाहलाई व्यवस्थित गर्दै लैजाने क्रममा काउन्टर थप गरिएको बताए। उनका अनुसार नयाँ काउन्टर सञ्चालनमा आएपछि टिकट लिन लामो समय लाइनमा बस्नुपर्ने अवस्था कम हुने र बिरामीलाई उपचार प्रक्रियामा छिटो प्रवेश गर्न सहज हुनेछ।

प्रतिष्ठानले स्वास्थ्य बीमा सेवासँगै समग्र ओपीडी सेवामा हुने बिरामीको चाप व्यवस्थापनका लागि पनि विभिन्न व्यवस्थापकीय सुधार गर्दै आएको जनाएको छ। आगामी दिनमा सेवाग्राहीको संख्या र आवश्यकताका आधारमा थप व्यवस्थापन गरिने प्रतिष्ठानले जनाएको छ।