काठमाडौं – प्रतिनिधि सभाका उपसभामुख रुबीकुमारी ठाकुरले छोरीलाई दाइजो नभई शिक्षा दिन आग्रह गरेकी छिन् । शनिबार धनुषाको ढल्केबरमा नाई सहयोग संस्था नेपालको दोस्रो अधिवेशन तथा चौथो साधारणसभाको उद्घाटन गर्दै उनले दाइजोका कारण कसैलाई अन्याय भए आफूलाई सम्पर्क गर्न पनि आग्रह गरिन् ।

उपसभामुख ठाकुरले दाइजो प्रथाविरुद्ध आफूले निरन्तर आवाज उठाउँदै आएको पनि बताइन् । उनले दाइजो लिएर वा दिएर विवाह गर्ने तथा दाइजोका लागि दबाब दिने कार्य कानुनी रूपमा दण्डनीय हुने भएकाले त्यस्तो कार्य नगर्न आग्रह गरिन् । उनले भनिन्

‘छोरीलाई दाइजो नभई शिक्षा दिनुहोस्, छोराको विवाह गर्दा दाइजो नलिनुहोस्,’ उपसभामुख ठाकुरले भनिन्, ‘दाइजो समाजका लागि अभिसाप हो, सबै मिलेर यसको अन्त्य गरौँ।’