काठमाडौं। साहित्यकार कुमार नगरकोटीलाई नेपाल प्रज्ञा-प्रतिष्ठानको उपकुलपति नियुक्त गरिएको विषय प्रतिनिधिसभामा उठेको छ।

एमाले सांसद भूमिका लिम्बुले नगरकोटीको नियुक्तिप्रति आपत्ति जनाउँदै सार्वजनिक पदमा नियुक्ति गर्दा व्यक्तिको नैतिक आचरणसमेत मूल्यांकन गर्नुपर्ने बताएकी छन्।

प्रतिनिधिसभाको बैठकमा बोल्दै लिम्बुले प्रज्ञाप्रतिष्ठानका पदाधिकारी नियुक्ति प्रक्रिया पारदर्शी नभएको आरोप लगाइन्। आवेदन आह्वान गरिए पनि आवेदकको विवरण, सर्टलिस्ट तथा छनोट प्रक्रियाबारे सार्वजनिक रूपमा पर्याप्त जानकारी नदिइएको उनको भनाइ थियो।

उनले प्रज्ञा–प्रतिष्ठानलाई सामान्य सरकारी निकायका रूपमा मात्र हेर्न नहुने बताउँदै भाषा, साहित्य र संस्कृतिको संरक्षण गर्ने संस्थाको नेतृत्वमा पुग्ने व्यक्तिको योग्यता र नैतिक आचरण दुवै महत्वपूर्ण हुने धारणा राखिन्।

नगरकोटीको नियुक्तितर्फ संकेत गर्दै लिम्बुले महिलाप्रतिको दृष्टिकोण र सार्वजनिक अभिव्यक्तिलाई लिएर प्रश्न उठेको व्यक्तिलाई प्रतिष्ठानको नेतृत्वमा ल्याउनु गम्भीर विषय भएको बताइन्।

उनले सार्वजनिक पदमा नियुक्त हुने व्यक्तिको प्राज्ञिक योग्यतासँगै सामाजिक व्यवहार, नैतिकता र सार्वजनिक छविसमेत मूल्यांकन गर्ने व्यवस्था हुनुपर्ने माग गरिन्।