काठमाडौं। प्रधानमन्त्री बालेन्द्र शाहले प्रतिनिधिसभामा कालो चस्मा लगाउन नछाड्ने भएका छन्।

सभामुख डोलप्रसाद अर्यालले संसद् बैठकमा कालो चस्मा नलगाउन आग्रह गरेपछि प्रधानमन्त्री शाहले स्वास्थ्य कारण देखाउँदै संसद् सचिवालयमा चिकित्सकीय रिपोर्ट बुझाएका छन्।

गत साउन २२ गते नेपाली सेनाको छाउनीस्थित सैनिक अस्पतालमा गरिएको आँखाको परीक्षणमा शाहलाई उज्यालोमा हेर्न कठिन हुने र ‘ड्राई आई’को समस्या देखिएको रिपोर्टमा उल्लेख छ।

लेफ्टिनेन्ट कर्णेल डा. सचित ढकालले दिएको रिपोर्टमा आँखाको सहजताका लागि उज्यालो वातावरणमा कालो चस्मा प्रयोग गर्न सुझाव दिइएको छ। आवश्यकता अनुसार आइड्रप प्रयोग गर्नसमेत चिकित्सकले सुझाएका छन्।

स्वास्थ्य रिपोर्टसहितको पत्र संसद् सचिवालयमा पुगेको प्रवक्ता एकराम गिरीले पुष्टि गरेका छन्।

रिपोर्टको अनुवाद

सम्माननीय प्रधानमन्त्री वालेन्द्र शाहलाई उज्यालो प्रकाशमा हेर्न कठिनाइ हुने समस्या भएपछि मैले उहाँको आँखा परीक्षण गरेको छु। उहाँको आँखामा ‘ड्राई आई’ (आँखा सुक्खा हुने समस्या) देखिएको छ, जसका लागि आवश्यकता अनुसार पटक-पटक प्रयोग गर्न ‘कारबोक्सीमेथिलसेलुलोज ०.५%’  आई ड्रप सिफारिस गरिएको छ। साथै, आँखाका कष्टकर लक्षणहरूबाट राहत पाउन उज्यालो वातावरणमा रहँदा आँखाको सुरक्षात्मक उपाय (कालो चस्मा) प्रयोग गर्न समेत उहाँलाई थप सल्लाह दिइएको छ।

लेफ्टिनेन्ट कर्णेल डा. सचित ढकाल
सह-प्राध्यापक
एम.बी.बी.एस., एम.एस. (आँखा रोग विशेषज्ञ)
भिट्रियो-रेटिनल सर्जरी फेलो
नेपाल मेडिकल काउन्सिल नं. ४५९१