काठमाडौं। सुपरस्टार यशको बहुप्रतीक्षित फिल्म ‘टाक्सिक’ रिलिज हुनुअघि नै बक्स अफिसमा तहल्का मच्चाउने संकेत देखिएको छ।

बुधबारदेखि सिनेमाघरमा आउने फिल्मले एडभान्स बुकिङमै आक्रामक व्यापार गरिरहेको छ।

अगस्ट २१ देखि सुरु भएको बुकिङमा सोमबार साँझसम्म भारतमा मात्रै ७ लाखभन्दा बढी टिकट बिक्री भइसकेका छन्। उपलब्ध तथ्यांकअनुसार १५ हजार ४२२ शोका लागि ७ लाख १२ हजार ३६० टिकट बिक्री हुँदा एडभान्स बुकिङबाट २६.४ करोड भारु संकलन भएको छ। ब्लक सिटसमेत जोड्दा यो रकम ३४.९३ करोड भारु पुगेको बताइएको छ।

रिलिजको दुई दिनअघि नै यति ठूलो संख्यामा टिकट बिक्री भएपछि ‘टाक्सिक’ भारतमा सर्वाधिक प्रि–सेल गर्ने फिल्मको शीर्ष १० सूचीमा परेको छ। यसले ‘कल्कि २८९८ एडी’ र ‘जवान’ जस्ता चर्चित फिल्मलाई समेत पछाडि पारेको दाबी गरिएको छ।

एडभान्स बुकिङको यही गति कायम रहे फिल्मले पहिलो दिन भारतमै १०० करोड भारुभन्दा बढीको ओपनिङ गर्न सक्ने अनुमान गरिएको छ।

केजीएफ सिरिजको सफलतापछि यशको स्टारडमलाई लिएर ‘टाक्सिक’प्रति दर्शकको चासो उच्च छ। फिल्म प्यान–इन्डिया स्तरमा रिलिज हुँदैछ।

गीतु मोहनदास निर्देशित फिल्ममा यशसँगै कियारा आडवाणी, नयनतारा, हुमा कुरैशी र तारा सुतारियालगायत कलाकारको अभिनय छ।

‘टाक्सिक’ बुधबार, २६ अगस्टदेखि सिनेमाघरमा लाग्दैछ।