काठमाडौं । श्रम संस्कृति पार्टीका अध्यक्ष हर्क साम्पाङले विपद् व्यवस्थापनका लागि सरकारले परम्परागत शैली छाडेर प्रो–एक्टिभ योजना बनाउनुपर्ने बताएका छन् ।

प्रतिनिधिसभाको बुधबारको बैठकमा बोल्दै साम्पाङले विकासका नाममा सडक र पुल निर्माणमा मात्र जोड दिनुभन्दा विपद्का बेला तत्काल उद्धार गर्न आवश्यक प्रविधि, उपकरण र दक्ष जनशक्ति तयार पार्नुपर्ने बताए ।

उनले विपद्का बेला परिचालन गर्न सकिने हेलिकप्टर, एम्बुलेन्स, अत्याधुनिक उपकरण तथा दक्ष जनशक्तिमा राज्यले लगानी गर्नुपर्नेमा जोड दिए ।

भोटेकोशीमा आएको बाढी तिब्बततर्फबाट सुरु भएकाले छिमेकी मुलुकबीच समयमै सूचना आदानप्रदानको व्यवस्था हुनुपर्ने विषय पनि उनले उठाए । चीनले नेपाललाई बाढीबारे पूर्वसूचना दिएको थियो कि थिएन र नेपालले भारतलाई जानकारी गराएको थियो कि थिएन भन्ने विषयमा सरकारले स्पष्ट पार्नुपर्ने उनको भनाइ थियो ।

सामाजिक सञ्जालमा आएका सूचनालाई मात्र आधार नबनाई छिमेकी मुलुकबीच औपचारिक सूचना आदानप्रदानको संयन्त्र प्रभावकारी बनाउनुपर्ने साम्पाङले बताए ।

उद्धारमा खटिने टोलीले जमिनको अवस्था र सम्भावित जोखिमलाई ध्यान दिँदै सावधानी अपनाउनुपर्ने उल्लेख गर्दै उनले उद्धारकै क्रममा थप मानवीय क्षति हुन नदिन सचेत रहन आग्रह गरे ।

विपद्को समयमा सत्ता पक्ष र प्रतिपक्षको विभाजनभन्दा माथि उठेर ‘एक टिम, एक राष्ट्र’का रूपमा उद्धार, राहत र पुनःस्थापनामा जुट्नुपर्ने राईले बताए ।