मन्त्रालयले आपत्कालीन स्वास्थ्य सेवाको समन्वय, मेडिकल टोली परिचालन, प्रदेशगत समन्वय तथा महामारीको जोखिम नियन्त्रणका लागि छुट्टाछुट्टै अधिकारीलाई जिम्मेवारी दिएको हो।

स्वास्थ्य आपतकालीन अवस्थाको समग्र समन्वयका लागि स्वास्थ्य आपतकालीन कार्यसञ्चालन केन्द्र (एचईओसी) प्रमुख डा. हेमन्तचन्द्र ओझालाई जिम्मेवारी दिइएको छ। आपत्कालीन मेडिकल टोली र जनशक्ति परिचालनका लागि एचईओसीसँग समन्वय गर्ने गरी डा. रोशन न्यौपानेलाई तोकिएको मन्त्रालयले जनाएको छ।

प्रदेशस्तरीय समन्वयको जिम्मेवारी स्वास्थ्य सेवा विभागका डा. फणीन्द्रप्रसाद बराल र मन्त्रालयका डा. समीरकुमार अधिकारीलाई दिइएको छ।

त्यस्तै, रसुवामा संघीय स्वास्थ्य टोली परिचालनका लागि डा. प्रकाश ज्ञवाली र शंकर कँडेल तथा नुवाकोटका लागि डा. प्रशान्त नापित र प्रवीण कार्कीलाई जिम्मेवारी तोकिएको छ।

सम्भावित महामारीको जोखिम न्यूनीकरण, निगरानी र आवश्यक प्रतिकार्यका लागि इपिडिमियोलोजी तथा रोग नियन्त्रण महाशाखाका डा. अमृत पोखरेललाई फोकल पर्सन बनाइएको छ।

मन्त्रालयले विपद्का बेला सर्वसाधारण, स्वास्थ्यकर्मी र स्वास्थ्य संस्थाबीच सहयोग तथा समन्वय सहज बनाउन ‘विपद् स्वास्थ्य सहयोग समन्वय’ प्रणाली सञ्चालनमा ल्याएको छ।

यस प्रणालीमार्फत उपचार, औषधि तथा अन्य स्वास्थ्य सहयोग आवश्यक परेका व्यक्तिले अनुरोध गर्न सक्नेछन्। स्वास्थ्यकर्मीले स्वयंसेवाका लागि आफ्नो विवरण दर्ता गर्न तथा स्वास्थ्य संस्थाले मेडिकल टोली, औषधि वा उपकरण सहयोगको प्रस्ताव राख्न सक्ने व्यवस्था गरिएको मन्त्रालयले जनाएको छ।

मन्त्रालयले विपद् प्रभावित क्षेत्रमा औषधि तथा स्वास्थ्य सामग्री सहयोग गर्न इच्छुक व्यक्ति तथा संस्थालाई आवश्यक सहयोग उपलब्ध गराउनसमेत आग्रह गरेको छ।