काठमाडौं। चिनियाँ राष्ट्रपति सी जिनपिङले बाढी र पहिरोपछि बनेको नयाँ अवरोध ताल (ब्यारियर लेक) तथा आसपासको क्षेत्रमा विशेष निगरानी राख्न अधिकारीहरूलाई निर्देशन दिएका छन्।

चिनियाँ कम्युनिस्ट पार्टी (सीपीसी)का वरिष्ठ नेताहरूको शुक्रबार बसेको बैठकमा राष्ट्रपति सीले उद्धार तथा राहत कार्यसँगै अवरोध तालबाट थप विपद् निम्तिन सक्ने सम्भावनालाई उच्च प्राथमिकतामा राख्न निर्देशन दिएका हुन्।

चिनियाँ सरकारी समाचार संस्था सिन्ह्वाका अनुसार सीले पहिरोका कारण बनेको ताल र आसपासका पहाडको स्थिरतामाथि निरन्तर निगरानी राख्न तथा थप विपद् हुन नदिन प्रभावकारी र कडा उपाय अपनाउन निर्देशन दिएका छन्।

बैठकको विवरणमा सीले भनेका छन्, ‘पहिरोका कारण बनेको ताल र आसपासका पहाडको स्थिरतामा नजिकबाट निगरानी राख्नुपर्छ र थप विपद् हुन नदिन प्रभावकारी उपायहरू कडाइका साथ अपनाउनुपर्छ।’

राष्ट्रपति सीको यस्तो निर्देशन तालले बाँध नाघेर पानी बग्न थालेको पछिल्लो घटना सार्वजनिक हुनुअघि दिइएको बताइएको छ। बुधबार नेपाल–तिब्बत सीमा क्षेत्रमा गएको शक्तिशाली बाढीपछि पहिरोका कारण बनेको उक्त अवरोध तालमा पानीको सतह बढ्दै गएपछि ओभरफ्लो हुन थालेको हो।

तालबाट पानी बाहिरिन थालेसँगै आसपासका क्षेत्रमा थप पहिरो तथा आकस्मिक बाढीको जोखिम बढेको छ। यसले बाढी तथा पहिरो प्रभावित क्षेत्रमा जारी उद्धार र राहत कार्यलाई समेत थप चुनौतीपूर्ण बनाएको छ।

उच्च हिमाली भूभागमा रहेका हिमनदी, हिमताल, भिराला पहाड र कमजोर भू–संरचनाका कारण उद्धार कार्य कठिन बनेको चिनियाँ पक्षले जनाएको छ। त्यसमाथि मौसममा भइरहेको परिवर्तनले पनि जोखिम थप बढाएको बताइएको छ।

सिन्ह्वाका अनुसार राष्ट्रपति सीले विपद्मा परी ज्यान गुमाएकाहरूप्रति श्रद्धाञ्जली व्यक्त गर्दै बैठकमा सहभागी सबैलाई एक मिनेट मौनधारण गर्नसमेत आग्रह गरेका थिए।

बैठकको विवरणमा पछिल्लो विपद् उच्च हिमाली तथा चिसो क्षेत्रमा, भिराला उपत्यका र परिवर्तनशील मौसमका बीच भएको उल्लेख गरिएको छ। उक्त क्षेत्रमा धेरै हिमनदी, हिमताल तथा सम्भावित भौगर्भिक जोखिम रहेकाले उद्धार, खोजी तथा राहत कार्य निकै कठिन रहेको चिनियाँ पक्षको भनाइ छ।

चीनले बिहीबार बिहान सार्वजनिक गरेको पछिल्लो विवरणअनुसार तिब्बततर्फ बाढी तथा पहिरोमा परी ३ जनाको मृत्यु भएको छ भने ५५८ जना अझै बेपत्ता छन्। बेपत्ताको खोजी तथा उद्धारका लागि चिनियाँ अधिकारीहरूले विभिन्न टोली परिचालन गरेका छन्।

यसैबीच, बिहीबार दिउँसो चिनियाँ विदेश मन्त्रालयका प्रवक्ताले नेपालतर्फ पनि १०० भन्दा बढी चिनियाँ नागरिक बेपत्ता रहेको जानकारी दिएका थिए।

बुधबार नेपाल–तिब्बत सीमावर्ती क्षेत्रमा गएको विनाशकारी बाढीले नेपालतर्फ पनि ठूलो जनधनको क्षति गरेको छ। पछिल्लो विवरणअनुसार नेपालमा बाढी, पहिरो तथा त्यसबाट उत्पन्न दुर्घटनामा परी ४८९ जनाको मृत्यु पुष्टि भएको छ। खोज तथा उद्धार कार्य अझै जारी रहेकाले मृतक र बेपत्ताको संख्या थप बढ्न सक्ने अधिकारीहरूले बताएका छन्।

अवरोध तालबाट पानीको बहाव बढ्दै गएको अवस्थामा नेपालतर्फ पनि त्रिशूली तथा भोटेकोशी नदी आसपासका बस्तीमा जोखिम बढेको भन्दै स्थानीय प्रशासनले उच्च सतर्कता अपनाउन आग्रह गरेको छ।