काठमाडौं । कन्नड स्टार यशको मुख्य भूमिका रहेको फिल्म ‘टक्सिकः अ फेयरी टेल फर ग्रोन–अप्स’ले प्रदर्शनको पहिलो दिन आक्रामक सुरुवात गरे पनि दोस्रो दिन भने बक्स अफिसमा ठूलो गिरावट बेहोरेको छ।

बुधबारदेखि प्रदर्शनमा आएको एक्सन–थ्रिलर फिल्मले समीक्षक र दर्शकबाट मिश्रित प्रतिक्रिया पाइरहेको छ। तर त्यसको असर पहिलो दिनको व्यापारमा खासै देखिएन। फिल्मले भारतमा पहिलो दिन १०१ करोड १० लाख भारु कमाएको थियो भने विश्वव्यापी रूपमा करिब १४० करोड भारुको कारोबार गरेको बताइएको छ।

व्यापारसम्बन्धी वेबसाइट स्याकनिल्कको प्रारम्भिक तथ्यांकअनुसार बिहीबार रातिसम्म भारतमा फिल्मले ३६ करोड ४० लाख भारु कमाएको छ। पहिलो दिनको तुलनामा दोस्रो दिनको कमाइ करिब ६४ प्रतिशतले घटेको हो।

फिल्मको पहिलो दिनको अकुपेन्सी ५६.१ प्रतिशत रहेकोमा दोस्रो दिन यो दर घटेर २६.६ प्रतिशतमा झरेको छ। दुई दिनको भारततर्फको कुल कमाइ भने १३७ करोड ५० लाख भारु पुगेको छ।

भाषागत प्रदर्शन हेर्दा ‘टक्सिक’ले कन्नडभन्दा हिन्दी बजारमा राम्रो व्यापार गरिरहेको देखिएको छ। हिन्दीपछि तेलुगु संस्करणले पनि दर्शकको राम्रो साथ पाएको छ। भने तमिल र मलयालम संस्करणको व्यापार तुलनात्मक रूपमा कमजोर देखिएको छ।

फिल्मको प्रदर्शनअघि नै यशका प्रशंसकबीच ‘टक्सिक’लाई लिएर ठूलो उत्सुकता थियो। रिलिजको पाँच दिनअघिसम्म भारतमा १८ लाखभन्दा बढी टिकट बिक्री भइसकेका थिए। त्यसका बाबजुद प्रदर्शनपछि फिल्मले हिंसात्मक दृश्य, बोल्ड प्रस्तुति र कमजोर पटकथालाई लिएर आलोचना खेपिरहेको छ।

सप्ताहन्त सुरु भएसँगै फिल्मको व्यापारमा सुधार आउने अपेक्षा गरिएको छ। व्यापार विश्लेषकहरूले दर्शकको साथ कायम रहे पहिलो सप्ताहन्तमै फिल्मले भारतमा २०० करोड भारुको आँकडा पार गर्न सक्ने अनुमान गरेका छन्।

केभीएन प्रोडक्सन र मोन्स्टर माइन्ड क्रिएशन्सको निर्माण रहेको फिल्ममा यश पहिलोपटक दोहोरो भूमिकामा देखिएका छन्। उनले राया र टिक्का नामका बुबा–छोराको भूमिका निर्वाह गरेका छन्।

फिल्ममा कियारा आडवाणी, नयनतारा, हुमा कुरेशी र तापसी पन्नूको समेत अभिनय छ। ‘टक्सिक’मार्फत यश करिब चार वर्षपछि ठूलो पर्दामा फर्किएका हुन्। उनी पछिल्लो पटक सन् २०२२ मा रिलिज भएको सफल फिल्म ‘केजीएफः च्याप्टर २’मा देखिएका थिए।