काठमाडौं – गृहमन्त्री सुदन गुरुङले रसुवा बाढीका कारण हाइड्रो सुरुङमा फसेकाको उद्धारका लागि ड्रिलिङदेखि सबै विकल्प खोजिरहेको बताएका छन् ।

उनले सुरुङमा फसेकाको उद्धारका लागि माथिबाट ड्रिल गर्ने तयारीमा रहेको बताए । उनले सुरुङमा फसेकाको उद्धारमा हरसम्भव प्रयास भइरहेको बताए ।

‘अझै पनि हामीले होप लुज (आशा मारेको) गरेका छैनौं । माथिबाट पनि छिर्न सकिन्छ कि, उहाँहरू त्यहाँको नै पानी खाएर बस्नुभएको छ कि भन्ने पनि लाएको छ । हाम्रो सुरक्षा संयन्त्र अझै पनि त्यहाँ काम गर्नुभएको छ’ उनले भने – ‘हाम्रो नयाँ विचार के आएको छ भने माथिको ठाउँबाट पनि खनेर बरु त्यसलाई ड्रिल गरेर केही गर्न सक्यौं भने पनि केही सम्भावना छ कि भनेर राज्यले प्रयास गरिरहेको छ’

गृहमन्त्री गुरुङले प्रभावित क्षेत्रमा राहत पुर्‍याउन राज्यका सबै हेलिकप्टर तथा उपलब्ध संयन्त्र परिचालन गरिएको बताए । उनले राज्य आफ्नो कर्तव्यबाट पछि नहट्ने स्पष्ट पार्दै कुनै स्थानमा राहत नपुगेको भए सरकारलाई जानकारी गराउन आग्रह गरे ।

‘उहाँहरू सुरक्षाकर्मी भए पनि देशका नागरिक हुन् । कसैले उहाँहरूको अवस्था के छ, परिवारको अवस्था कस्तो छ भनेर सोधेको छैन । उहाँहरू पनि नेपाली नागरिक नै हुन् । त्यैपनि राज्यको ब्याकबोनको हिसाबले आफ्नो जिम्मेवारी पूर्णरूपमा पालना गरिरहनुभएको छ,’ उनले भने ।