बाँके । पाठेघरको मुखको क्यान्सर रोकथामका लागि बाँकेमा करिब ६ हजार किशोरीलाई एचपीभी खोप दिइने भएको छ।

स्वास्थ्य कार्यालयका अनुसार भदौ ३० गतेदेखि जिल्लाका आठवटै स्थानीय तहमा अभियान सञ्चालन हुने जनाइएको छ।

कक्षा ६ मा अध्ययनरत किशोरीलाई प्राथमिकतामा राखेर विद्यालयबाट खोप दिइनेछ। त्यसपछि समुदायमा रहेका १० वर्षीया किशोरीलाई खोप लगाइने स्वास्थ्य कार्यालय बाँकेकी प्रमुख सुनिता पौडेलले जानकारी दिइन्।

खोप अभियानका लागि स्थानीय तह, विद्यालय र स्वास्थ्य संस्थाबीच समन्वय भइरहेको छ। एचपीभी खोप एक मात्रा मात्र दिइने स्वास्थ्य कार्यालयले जनाएको छ।

जिल्ला समन्वय समिति प्रमुख ज्ञानेन्द्रकुमार चौधरीको अध्यक्षतामा बसेको बैठकले अभियान सञ्चालन गर्ने निर्णय गरेको हो।