झापा । कचनकवल गाउँपालिकाले रसुवा बाढी पीडितका लागि प्रधानमन्त्री दैवी प्रकोप उद्धार कोषमा रु २९ लाख छ हजार १०० सहयोग रकम उपलब्ध गराउने निर्णय गरेको छ ।गाउँपालिकाका प्रमुख प्रशासकीय अधिकृत स्काइ पोखरेलका अनुसार गाउँपालिकाका जनप्रतिनिधि, कर्मचारी, स्वास्थ्यकर्मी तथा सामुदायिक विद्यालयमा कार्यरत शिक्षक एवं कर्मचारीका तर्फबाट सो रकम एकमुष्ट रूपमा कोषमा दाखिला गर्न लागिएको हो ।

विपद् व्यवस्थापन कोषबाट रु एक लाख, जनप्रतिनिधिका तर्फबाट रु ७१ हजार, सम्पूर्ण गाउँपालिका कर्मचारीका तर्फबाट रु नौ लाख २२ हजार ५२४ र सामुदायिक विद्यालयका शिक्षक तथा कर्मचारीका तर्फबाट रु १८ लाख १२ हजार ५६७ गरी कुल रु २९ लाख छ हजार १०० उपलब्ध गराउने निर्णय गरेको हो ।
गत भदौ १० गते हिमताल विस्फोटका कारण रसुवा, नुवाकोट, धादिङ र चितवन जिल्लालगायत क्षेत्रमा भोटेकोशी र त्रिशूली नदीमा आएको बाढीले पुर्याएको ठूलो धनजनको क्षतिप्रति गाउँपालिकाले गहिरो दुःख व्यक्त गरेको छ ।

गाउँपालिकाले मृतकप्रति श्रद्धाञ्जली अर्पण गर्दै शोककुल परिवारजनमा समवेदना प्रकट गरेको छ । साथै, बेपत्ताको खोजी, उद्धार, घाइतेको उपचार तथा विस्थापितको पुनःस्थापनाका लागि सरकारी निकाय, सुरक्षा निकाय, सामाजिक सङ्घसंस्था एवं निजी क्षेत्रलाई आआफ्नोतर्फबाट सहयोग गर्न अपिलसमेत गरेको छ ।बाढीबाट प्रभावित नागरिकको उद्धार, राहत, उपचार तथा पुनःस्थापनाका लागि रुपन्देहीको ओमसतिया गाउँपालिकाले रु २४ लाख १७ हजार ९०० सहयोग गरेको छ ।

गाउँपालिकाले उक्त रकम प्रधानमन्त्री दैवी प्रकोप उद्धार कोषमा जम्मा हुनेगरी उपलब्ध गराएको हो । बाढीबाट विभिन्न जिल्लामा जनधनको क्षति भएकाले प्रभावितलाई सहयोग पुर्याउने उद्देश्यले रकम सङ्कलन गरिएको गाउँपालिकाले जनाएको छ ।गाउँपालिका अध्यक्ष, उपाध्यक्ष, वडाध्यक्ष, कार्यपालिका सदस्यलगायत निर्वाचित जनप्रतिनिधि, राष्ट्रसेवक कर्मचारी तथा सामुदायिक विद्यालयका शिक्षक, कर्मचारीबाट रकम सङ्कलन गरिएको हो ।

गाउँपालिकाले विपद्मा परी ज्यान गुमाएका नागरिकप्रति श्रद्धाञ्जली तथा घाइतेको शीघ्र स्वास्थ्यलाभको कामना गर्दै प्रभावित परिवारप्रति ऐक्यबद्धता जनाएको छ ।भोटेकोशी बाढी प्रभावित क्षेत्रमा उद्धार, राहत र पुनःस्थापनाका लागि सहयोग आवश्यक रहेकाले आफ्नो तहबाट योगदान गरिएको गाउँपालिकाले जनाएको छ ।

कपिलवस्तु कारागारका कैदीबन्दीले प्रधानमन्त्री विपद् राहत कोषमा एक लाख एक हजार १११ रुपैयाँ संकलन गरेका छन् । कारागारमा रहेका ४२२ कैदीबन्दीले विपद्मा सहयोग गर्न चन्दा सङ्कलन गरेका थिए ।विपद्को समयमा आफूहरू पनि प्रभावित नागरिकको पीडामा साथ दिन चाहेको भन्दै बन्दीले व्यक्तिगत रूपमा प्राप्त हुने खर्चबाट रकम छुट्याएर सहयोग गरेको कारागार प्रशासनले जनाएको छ ।

बन्दीहरूले पीडितको राहत तथा उद्धारका लागि उक्त रकम आफैँमा सङ्कलन गरेर प्रधानमन्त्री विपद् राहत कोषमा जम्मा गरेको कारागार प्रमुख मानबहादुर सारुले बताए ।रसुवाको भोटेकोशीमा आएको भीषण बाढी ठूलो जनधनको क्षति भएको छ । कैदीबन्दीले पैसा जम्मा गरेको भौचर प्रमुख जिल्ला अधिकारी जनार्दन गौतमलाई हस्तन्तरण गरेका छन् ।