काठमाडाैँ । जर्मनीको पूर्वी राज्य साक्सोनी–आनहाल्टमा दक्षिणपन्थी पार्टी ‘अल्टरनेटिभ फर जर्मनी’ (एएफडी)ले प्रतिद्वन्द्वीलाई फराकिलो अन्तरले पछि पार्दै चुनावी सफलता हात पारेको छ ।

प्रारम्भिक परिणामअनुसार एएफडीले ४३.८ प्रतिशत मत प्राप्त गरेको छ । दोस्रो स्थानमा रहेको रूढिवादी क्रिस्चियन डेमोक्रेटिक युनियन (सीडीयू)ले भने १७.२ प्रतिशत मत पाएको छ ।

तर सबैभन्दा धेरै मत पाए पनि एएफडीलाई एकल सरकार गठन गर्न आवश्यक बहुमत पुगेको छैन । त्यसैले अब राज्यमा सरकार गठनका लागि विभिन्न दलबीच सत्ता समीकरणको कसरत सुरु हुने भएको छ ।

एएफडीका राज्य नेता उलरिख सिगमन्डले चुनावी परिणामलाई ‘सनसनीपूर्ण’ भन्दै जनताले आफ्नो पार्टीलाई सरकार चलाउने स्पष्ट जनादेश दिएको दाबी गरेका छन् ।

यदि एएफडीले सरकारको नेतृत्व गर्ने अवसर पाएमा दोस्रो विश्वयुद्धपछि पहिलोपटक जर्मनीको कुनै राज्यमा दक्षिणपन्थी पार्टी नेतृत्वमा पुग्नेछ । सरकारको नेतृत्व पाए एएफडीले प्रहरी प्रशासन, स्थानीय शिक्षा र संस्कृति लगायत महत्वपूर्ण क्षेत्रमा नीति तथा निर्णय गर्ने अधिकार पाउनेछ ।

करिब २१ लाख जनसंख्या रहेको साक्सोनी–आनहाल्टमा एएफडीलाई जर्मनीको घरेलु गुप्तचर निकायले ‘दक्षिणपन्थी अतिवादी’का रूपमा वर्गीकरण गरेको छ । ३५ वर्षीय सिगमन्डले भने उक्त वर्गीकरणलाई अस्वीकार गर्दै आएका छन् ।