काठमाडौं । नेपाल क्रिकेट संघ (क्यान) ले नेपाल प्रिमियर लिग (एनपीएल) को तेस्रो संस्करणका लागि मिडिया तथा टिकटिङ अधिकारको बोलपत्र प्रक्रिया टुंग्याएको छ ।

क्यानले सार्वजनिक गरेको विवरणअनुसार ओटीटी अधिकारतर्फ नेटटीभी प्रालि विजेता बनेको छ । नेटटीभीले १८ करोड ४ लाख रुपैयाँमा ओटीटी अधिकार प्राप्त गरेको हो ।

त्यस्तै, लिनियर टेलिभिजन अधिकारतर्फ नेपाल क्षेत्रका लागि हिमालय टेलिभिजन नेटवर्क प्रालि छनोट भएको छ । हिमालय टेलिभिजनले २४ करोड ४४ लाख रुपैयाँमा उक्त अधिकार प्राप्त गरेको क्यानले जनाएको छ ।

यसैगरी, एनपीएलको टिकटिङ अधिकार इसेवा लिमिटेडले पाएको छ । टिकटिङ अधिकारका लागि इसेवाले ८५ लाख रुपैयाँ तिर्नेछ । सहमति भएका व्यावसायिक शर्तअनुसार टिकट बिक्रीबाट प्राप्त आम्दानीको ९५ प्रतिशत क्यान र ५ प्रतिशत इसेवाले पाउनेछन् ।

क्यानले अधिकार प्राप्त गर्ने नेटटीभी, हिमालय टेलिभिजन र इसेवालाई बधाई दिँदै एनपीएलको तेस्रो संस्करणलाई अझ सफल, व्यवस्थित र प्रभावकारी बनाउन सबै साझेदारसँग सहकार्य गर्ने प्रतिबद्धता जनाएको छ ।

क्यानका सचिव पारस खड्काले जारी गरेको विज्ञप्तिमा बोलपत्र तथा खरिद प्रक्रियामार्फत अधिकार प्रदान गरिएको उल्लेख छ ।