काठमाडौं । सिर्सिया खोलामा भइरहेको प्रदूषण नियन्त्रण गर्न उद्योग, वाणिज्य तथा आपूर्तिमन्त्री गौरी कुमारीले बारा–पर्सा औद्योगिक करिडोरका उद्योगीलाई एक साताको समय दिएकी छन् ।

मन्त्रालयमा उद्योगीहरूसँगको छलफलमा उनले वातावरणीय मापदण्ड पालना नगर्ने उद्योगमाथि कारबाही गर्ने चेतावनी दिँदै तत्काल सुधार थाल्न निर्देशन दिइन् ।

सिमरा र वीरगञ्ज क्षेत्रका उद्योगबाट प्रशोधनबिनै औद्योगिक फोहोर र दूषित पानी खोलामा मिसाउँदा सिर्सिया प्रदूषित बनेको छ । यसको असर आसपासका बस्तीका बासिन्दा, पशुपालन र जनस्वास्थ्यमा परेको मन्त्रालयको भनाइ छ ।

मन्त्री गौरीले पटक–पटक सचेत गराउँदा पनि सुधार नभएको भन्दै उद्योगीलाई अब तत्काल काम देखाउन निर्देशन दिइन् ।

‘तपाईंहरूलाई एक हप्ताको समय छ, के–के सुधार गर्नुपर्ने हो, आजैदेखि थाल्नुहोस्,’ उनले भनिन् ।

उनका अनुसार आगामी साता मन्त्रालयको विशेष टोलीले स्थलगत निरीक्षण गर्नेछ । अनुगमनमा वातावरणीय मापदण्ड उल्लङ्घन भएको पाइए कानुनअनुसार कारबाही अघि बढाइनेछ ।