काठमाडौं। एसीसी प्रिमियर कप क्रिकेटमा नेपालले समूह चरणको अन्तिम खेलमा हार बेहोरेको छ।

हङकङसँग नेपाल १५ रनले पराजित भए पनि यसअघि नै सेमिफाइनलमा पुगेको नेपाल रनरेटका आधारमा समूह विजेता बनेको छ।

हङकङले दिएको २६२ रनको लक्ष्य पछ्याएको नेपालले ४९.१ ओभरमा सबै विकेट गुमाउँदै २४६ रन मात्र बनाउन सक्यो।

नेपालका लागि इशान पाण्डेले सर्वाधिक ९० रनको योगदान दिए। आशिफ शेखले ४४, दीपेन्द्रसिंह ऐरीले २५, करण केसीले २१ तथा गुलशन झाले २० रन बनाए। इशानको उत्कृष्ट पारीका बाबजुद नेपाल लक्ष्यसम्म पुग्न सकेन।

हङकङका अइजाज खानले चार विकेट लिए। यसिम मुर्ताजाले दुई तथा किन्चित देवांग सिंह, नुसरुल्ला राणा र अतिकुल इकबालले एक–एक विकेट लिए।

त्यसअघि क्वालालम्पुरस्थित बायुमास ओभलमा टस जितेर पहिले ब्याटिङ गरेको हङकङले निर्धारित ५० ओभरमा ७ विकेट गुमाएर २६१ रनको योगफल तयार पारेको थियो।

हङकङका बाबर हयातले अविजित ११७ रनको शतकीय पारी खेले। शाहिद वसिफले ४५ र जिशन अलीले १५ रन थप्दा एहसान खान ३५ रनमा नटआउट रहे।

नेपालका लागि सन्दीप लामिछानेले चार तथा शेर मल्लले तीन विकेट लिए।

समूह चरणमा नेपालले यसअघि बहराइनलाई ७ विकेट, आयोजक मलेसियालाई ६ विकेट र साउदी अरेबियालाई ५ विकेटले पराजित गरेको थियो।

चार खेलबाट ६ अंक जोडेको नेपाल हङकङसँग पराजित भए पनि राम्रो रनरेटका कारण समूहको शीर्ष स्थानमा रहँदै सेमिफाइनल पुगेको हो।