काठमाडौं । नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीले गत वर्ष भदौ २४ गते भएको हिंसा र विध्वंसलाई नेपालको इतिहासकै ‘कालो अध्याय’ भएको बताएका छन् ।

भदौ २४ को घटनाको एक वर्ष पूरा भएको अवसरमा बुधबार प्रेस वक्तव्य जारी गर्दै ओलीले उक्त घटना राष्ट्रियता, लोकतन्त्र र संविधानको प्रगतिशील बाटो उल्ट्याएर मुलुकलाई सर्वसत्तावाद, अराजकता र भूराजनीतिक द्वन्द्वतर्फ धकेल्ने घातक योजनाको मूर्त रूप भएको दाबी गरेका हुन् ।

उनले प्रदर्शनका नाममा अराजकता र परिवर्तनका नाममा हिंसालाई वैधता दिने प्रयासले लोकतान्त्रिक दृष्टान्तलाई कमजोर पार्ने भन्दै त्यसको दीर्घकालीन असरप्रति चिन्ता व्यक्त गरेका छन् ।

ओलीले भदौ २४ को विध्वंसका आरोपीलाई उन्मुक्ति दिने तथा उनीहरूविरुद्ध सुरु भएका अनुसन्धान र अभियोजन रोक्ने कामले राजनीतिको अपराधीकरणलाई संस्थागत गरेको आरोपसमेत लगाएका छन् ।

उनले राष्ट्रपति भवन, प्रधानमन्त्री निवास, सिंहदरबार, संसद् भवन, सर्वोच्च अदालत, राजनीतिक दलका कार्यालय, शहीद तथा अग्रजका स्मारकसहित सार्वजनिक तथा निजी सम्पत्तिमा भएको आगजनी र तोडफोडलाई गम्भीर घटनाका रूपमा व्याख्या गरेका छन् ।

‘शान्तिपूर्ण प्रदर्शन भनेर अनुमति लिइएको कार्यक्रम कसरी हिंसात्मक बन्यो र त्यसका लागि को जिम्मेवार छन्’ भन्ने विषयमा गहिरो छानबिन हुनुपर्ने ओलीको माग छ । राज्यका मुख्य धरोहर र लोकतन्त्रमाथि आक्रमण हुँदा सुरक्षा निकायले त्यसलाई किन रोक्न सकेनन् भन्ने प्रश्नसमेत उनले उठाएका छन् ।

ओलीले भदौ २३ गतेको प्रदर्शन र त्यसपछिका घटनामा ज्यान गुमाएका युवासहित कर्तव्य पालनाका क्रममा मारिएका प्रहरीप्रति श्रद्धाञ्जली व्यक्त गरेका छन् । उनले उपचाररत घाइतेको शीघ्र स्वास्थ्यलाभको कामना गर्दै घटनापछि पुनर्निर्माणमा जुटेका राजनीतिक-सामाजिक व्यक्तित्व तथा व्यवसायीप्रति पुनरुत्थानको शुभेच्छा व्यक्त गरेका छन् ।

उनले अब त्यस्तो घटना दोहोरिन नदिन लोकतन्त्र, संविधान, राष्ट्रिय हित र स्वाभिमानको रक्षाका लागि देशभक्त, लोकतान्त्रिक, प्रगतिशील तथा वामपन्थी शक्ति एकजुट हुनुपर्नेमा जोड दिएका छन् ।

ओलीले लोकतन्त्र, संविधान र राष्ट्रिय हितको रक्षाका लागि सबै सम्बन्धित शक्ति र व्यक्तिलाई सहकार्य गर्दै अघि बढ्न अपिलसमेत गरेका छन्।